کرم: سینٹرل کرم میں فوجی قافلے پر حملہ، 8 اہلکار ہلاک، متعدد زخمی

واشنگٹن (ش ح ط) صوبہ خیبر پختونخوا کے قبائلی ضلع کُرم میں فوجی قافلے پر حملے میں آٹھ اہلکار ہلاک ہوگئے۔

ڈیلی اردو کو سرکاری ذرائع سے موصول ہونے والی اطلاعات کے مطابق قبائلی ضلع کرم کی تحصیل سینٹرل کرم میں فوجی قافلے پر گھات لگا کر حملہ کیا گیا جس کے نتیجے میں کم از کم 8 اہلکار ہلاک جبکہ متعدد زخمی ہو گئے۔ سرکاری ذرائع کا مزید کہنا ہے کہ زخمیوں میں بعض کی حالت تشویشناک بتائی جاتی ہے۔

اطلاعات کے مطابق حملہ آوروں نے پہلے ٹرک پر بم سے حملہ کیا اور پھر اندھا دھند فائرنگ کر دی۔ کارروائی کے بعد حملہ آور فرار ہونے میں کامیاب ہو گئے۔

ذرائع کے مطابق ہلاک ہونے والے فوجیوں کی شناخت جلال، نائیک عارف، نائیک وحدت، سپاہی عمران، سپاہی مصطفیٰ، سپاہی جاوید، سپاہی اویس کے طور پر کی گئی ہے۔

دوسری جانب کالعدم جماعت الاحرار ہے حملے کی ذمہ داری قبول کرنے کا دعوی کیا ہے۔

کرم میں تحریک طالبان پاکستان سے منسلک سابقہ جماعت الاحرار کے مجاہدین کی اکثریت ہے جہاں وہ وقتا فوقتا پولیس، ایف سی اور فوج پر حملے کرتے ہیں۔

فوج کے شعبہ تعلقات عامہ آئی ایس پی آر نے اس واقعے کے بارے میں ابھی تک کوئی بیان جاری نہیں کیا۔