کرم میں دہشت گردانہ حملہ: اہلِ تشیع باپ اور بیٹی ہلاک، دوسری بیٹی شدید زخمی

واشنگٹن (ش ح ط)پاکستان کے شورش زدہ قبائلی ضلع کرم کی تحصیل لوئر کرم کے علاقے مخی زئی میں دہشت گردوں نے ایک گاڑی پر اندھا دھند فائرنگ کی، جس کے نتیجے میں اہلِ تشیع برادری سے تعلق رکھنے والا ایک شخص اور اس کی بیٹی ہلاک جبکہ دوسری بیٹی شدید زخمی ہوگئی۔

پولیس کے مطابق ہلاک ہونے والے شخص کا نام زاہد حسین ہے، جو اپنی دو بیٹیوں کے ہمراہ رشتہ داروں کی شادی میں شرکت کے لیے پارہ چنار جا رہے تھے کہ راستے میں دہشت گردوں کے حملے کا شکار ہوئے۔ زخمیوں کو فوری طور پر ڈی ایچ کیو اسپتال پارہ چنار منتقل کر دیا گیا۔ واقعہ ایک سنی اکثریتی علاقے میں پیش آیا۔

یہ حملہ ایسے وقت ہوا جب دو روز قبل لوئر کرم کے مہورہ احمد خان کلی میں دہشت گردوں نے ایک گاڑی پر فائرنگ کر کے اہلِ سنت چمکنی قبیلے کے چھ افراد کو ہلاک کیا تھا۔ اس واقعے کے بعد حکومت اور قبائلی مشران نے مبینہ ملزم تجمل حسین کے گھر کو بارودی مواد سے مسمار کر دیا، جبکہ ملزم تاحال فرار ہے۔

حالیہ ایک ماہ کے دوران ضلع کرم میں شدت پسند گروہوں کے مابین کشیدگی میں اضافہ دیکھا گیا ہے۔ اطلاعات کے مطابق اس عرصے میں شیعہ اور سنی تنظیموں نے چار افراد کو اغوا کے بعد ہلاک کیا۔

حکام کے مطابق اس خطے میں ایرانی حمایت یافتہ زینبیون بریگیڈ اور سنی عسکریت پسند گروہ العائشہ بریگیڈ سرگرم ہیں، جنہیں کالعدم تحریک طالبان پاکستان اور لشکر جھنگوی کی حمایت حاصل ہے۔

علاقائی ذرائع کے مطابق، کرم میں جولائی سے اب تک فرقہ وارانہ فسادات میں تقریبا 300 افراد ہلاک ہوچکے ہیں، جس سے ضلع میں قیامِ امن کی کوششیں شدید متاثر ہوئی ہیں۔ مسلسل حملوں اور جوابی کارروائیوں کے نتیجے میں مین شاہراہ پر آمدورفت بھی معطل ہوگئی ہے۔