کرم میں دہشت گردوں کی فائرنگ سے اہل سنت قبائل کے 6 افراد ہلاک

پاراچنار/صدہ/واشنگٹن (ڈیلی اردو رپورٹ) پاکستان کے شورش زدہ صوبہ خیبر پختونخوا کے قبائلی ضلع کرم میں دہشت گردوں نے ایک مسافر گاڑی پر اندھا دھند فائرنگ کردی، جس کے نتیجے میں اہل سنت چمکنی اور منگل قبائل سے تعلق رکھنے والے 6 افراد ہلاک ہوگئے۔

پولیس کے مطابق واقعہ منگل کی صبح پاراچنار سے تقریباً 20 کلومیٹر دور محورہ کے مقام پر پیش آیا، جب دڑادار سے صدہ جانے والی گاڑی کو نشانہ بنایا گیا۔ حملہ ایک ایسے علاقے میں ہوا جو اہل تشیع اکثریتی ہے۔

مقامی انتظامیہ کے اسسٹنٹ کمشنر عامر نواز خان نے تصدیق کی ہے کہ ہلاک ہونے والے تمام افراد اہل سنت قبائل سے تعلق رکھتے تھے۔ حکام کے مطابق واقعے کی فوری وجہ معلوم نہیں ہوسکی، تاہم تحقیقات جاری ہیں۔

ضلعی پولیس افسر ملک حبیب کے مطابق فائرنگ کے بعد لاشوں کو قریبی اسپتال منتقل کردیا گیا جبکہ علاقے کو گھیرے میں لے کر سرچ آپریشن شروع کردیا گیا۔ پولیس اور سیکیورٹی فورسز کی بھاری نفری، بشمول ایس پیز آپریشن، ڈی ایس پیز، ایس ایچ اوز، کرم ملیشیا اور فرنٹیئر کانسٹیبلری کے اہلکاروں نے جدید ہتھیاروں اور ڈرون کیمروں کی مدد سے آپریشن میں حصہ لیا۔ اس دوران احمد خان کلے اور قریبی علاقوں سے 23 مشتبہ افراد کو حراست میں لیا گیا۔

حکام کے مطابق گزشتہ ایک ماہ میں وادی کرم میں شیعہ اور سنی گروپوں کی جانب سے چار افراد کو اغوا کے بعد ہلاک کیا جا چکا ہے۔ 

اس علاقے میں ایرانی حمایت یافتہ زینبیون بریگیڈ اور سنی عسکریت پسند گروہ العائشہ بریگیڈ فعال ہیں، جسے لشکر جھنگوی اور کالعدم تحریک طالبان پاکستان کی پشت پناہی حاصل ہے۔

مقامی اور سرکاری ذرائع کا کہنا ہے کہ ان گروہوں کو بالترتیب انجمن حسینیہ اور انجمن فاروقیہ کی سرپرستی حاصل ہے، اور جب تک ان مراکز کے ذمہ داران کے خلاف مؤثر کارروائی نہیں کی جاتی، کرم میں فرقہ وارانہ کشیدگی برقرار رہنے کا خدشہ ہے۔