کوئٹہ پولیس کا انوکھا کارنامہ: ڈھائی سالہ بچے پر دہشتگردی کا مقدمہ درج کرلیا

کوئٹہ (ویب ڈیسک) پولیس موبائل پر فائرنگ کا مقدمہ ڈھائی سالہ بچے کیخلاف درج کرلیا گیا، ملزم بلال پردہشت گردی کی نو دفعات درج کی گئیں، بچے کا باپ بیٹے کے مستقبل سے پریشان ہوگیا۔

تفصیلات کے مطابق کوئٹہ میں میں ڈھائی سالہ بچے پر پولیس کی گاڑی پر فائرنگ کا مقدمہ درج کر لیا گیا، ذرائع کے مطابق مقدمے میں بلال پردہشت گردی کی9 دفعات درج کر دی گئیں ہیں۔

پولیس موبائل پر فائرنگ کا مقدمہ تھانہ نیو سریاب میں مقدمہ درج کیا گیا، ننھے ملزم کے وارنٹ گرفتاری جاری کر دیے گئے جس کے بعد بلال کی گرفتاری کیلیے اب تک 3 چھاپے بھی مارے جا چکے ہیں۔

اس حوالے سے بلال کے والد کا کہنا ہے کہ ڈھائی سال کا بچہ پولیس پر فائرنگ کیسے کر سکتا ہے؟ بلال تو اب تک چپس کھاتا اور جوس پیتا ہے، ہم نے بلال کے نام پر اسکول کھولا جس پر پولیس نے اسے بڑا آدمی سمجھ کر مقدمہ درج کر دیا۔

کیس کو ختم کرنے کیلئے کئی بار پولیس سے رابطہ کیا ہے مگر اب تک معاملہ حل نہیں ہو سکا، مقدمہ درج ہونے پر بچے کے مستقبل کے حوالے سے سخت پریشان ہوں۔