کوئٹہ: کسی سلیکٹڈ کو نہیں مانتے، بلاول بھٹو زرداری

کوئٹہ (ڈیلی اردو) چیئرمین پاکستان پیپلزپارٹی بلاول بھٹو زرداری نے کہا ہے کہ طاقت کا سرچشمہ عوام ہیں۔ ہمیں نہ تو سلیکٹڈ قبول ہے نہ ہی کسی ایمپائر کی انگلی۔ ضیاء اور مشرف کی آمریتوں کا سامنا کیا، اب بھی مقابلہ کریں گے۔

چیئرمین پاکستان پیپلز پارٹی بلاول بھٹو زرداری کا پنڈال میں پہنچنے پر شاندار استقبال کیا گیا۔ کارکنوں کی بڑی تعداد پنڈال میں موجود تھی۔ کنونشن کے آغاز پر شہداء کے بلند درجات کیلئے دعا کی گئی۔

ورکرز کنونشن سے خطاب کرتے ہوئے بلاول بھٹو زرداری نے کہا کہ شہید بےنظیر بھٹو کی برسی راولپنڈی میں منائیں گے۔ شہید ذوالفقار علی بھٹو کا کہنا تھا کہ طاقت کا سرچشمہ عوام ہیں۔ کسی سلیکٹڈ کو نہیں مانتے۔

چیئرمین پیپلزپارٹی نے کہا کہ تمام مظالم کے باوجود پارٹی قیادت نے پاکستان کھپے کا نعرہ لگایا۔ سلیکٹڈ سے 18ویں ترمیم پر حملے کروائے جارہے ہیں۔ چوروں لٹیروں کے خلاف نعرے لگانے والا آج انہیں کو ٹیکس ایمنسٹی دے رہا ہے۔

انہوں نے کہا کہ ہم نے پینشنز میں سو فیصد اور تنخواہوں میں 150 فیصد اضافہ کیا۔

بلاول بھٹو زرداری نے کہا کہ سلیکٹڈ سمجھتا ہے کہ وہ پیپلز پارٹی کو دباؤ میں لا سکتا ہے۔ ہم نے ضیاء اور مشرف جیسوں کا ڈٹ کر مقابلہ کیا ہے۔ آج بھی پیپلز پارٹی کے خلاف سازشیں ہورہی ہیں۔ سابق صدر آصف زرداری کے سندھ کے مقدمے پنڈی میں چل رہے ہیں۔ جہاں انہیں چھ ماہ تک قید رکھا گیا، انہیں طبی سہولیات نہیں دی گئیں جس سے ان کی صحت خراب ہوئی۔