کوہاٹ: درہ آدم خیل میں پاکستانی طالبان کی فائرنگ سے پولیس اہلکار ہلاک

کوہاٹ (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع کوہاٹ کے قبائلی علاقے درہ آدم خیل کے نواحی گاؤں طور چھپر میں طالبان نے پولیس اہلکار کو اغوا کرنے کی کوشش کی، تاہم مزاحمت پر اہلکار کو فائرنگ کر کے ہلاک کر دیا۔

پولیس کے مطابق واقعہ اُس وقت پیش آیا جب طالبان عسکریت پسند پولیس اہلکار یونس خان کے گھر داخل ہوئے اور اسے زبردستی ساتھ لے جانے لگے۔ اہلکار کی جانب سے سخت مزاحمت پر حملہ آوروں نے فائرنگ کر دی جس کے نتیجے میں وہ موقع پر ہی ہلاک ہوگئے۔ فائرنگ کے بعد دہشت گرد جائے وقوعہ سے فرار ہونے میں کامیاب ہو گئے۔

واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور علاقے کو گھیرے میں لے کر سرچ آپریشن شروع کر دیا۔ ہلاک اہلکار کی لاش ڈی ایچ کیو اسپتال کوہاٹ منتقل کی گئی، جہاں ضروری کارروائی کے بعد اسے پولیس لائنز کوہاٹ لے جایا گیا۔

پولیس لائنز میں یونس خان کی نماز جنازہ ادا کی گئی جس میں ڈی آئی جی کوہاٹ ریجن عباس مجید مروت، ڈی پی او ڈاکٹر زاہد اللہ، دیگر افسران اور پولیس جوانوں نے شرکت کی۔ نماز جنازہ کے بعد اہلکار کو پولیس اعزاز کے ساتھ سپردِ خاک کیا گیا اور جسد خاکی پر پھول چڑھائے گئے۔

دوسری جانب کالعدم تحریک طالبان پاکستان (ٹی ٹی پی) نے واقعے کی ذمہ داری قبول کرتے ہوئے دعویٰ کیا کہ مذکورہ اہلکار "جاسوسی" میں ملوث تھا اور اسے پکڑنے کی کوشش کے دوران فائرنگ کے تبادلے میں ہلاک کیا گیا۔

پولیس حکام نے کہا ہے کہ اہلکار کے ہلاکت میں ملوث دہشت گردوں کو ہر صورت گرفتار کیا جائے گا اور اس مقصد کے لیے علاقے میں سرچ آپریشن جاری ہے۔