کوہاٹ: پولیس پر حملہ، افسر ہلاک، 2 زخمی، جوابی آپریشن میں 3 دہشت گرد ہلاک

کوہاٹ (نمائندہ ڈیلی اردو) پاکستان کے شورش زدہ صوبے خیبرپختونخوا کے ضلع کوہاٹ کے تھانہ لاچی کی حدود میں دہشت گردوں کے خلاف پولیس کی کارروائی میں 3 دہشت گرد ہلاک اور 2 اہلکار زخمی ہو گئے۔

ریجنل پولیس افسر (آر پی او) عباس مجید مروت کے مطابق، در ملک میں دہشت گردوں کے بزدلانہ حملے کے بعد پولیس نے فوری جوابی کارروائی کی۔ حملے میں پروبیشنر اسسٹنٹ سب انسپکٹر (اے ایس آئی) اشفاق ہلاک ہو گئے جبکہ 2 کانسٹیبل زخمی ہوئے۔

واقعے کی اطلاع ملتے ہی آر پی او عباس مجید مروت اور ڈسٹرکٹ پولیس افسر ڈاکٹر زاہد اللّٰہ بھاری نفری کے ہمراہ موقع پر پہنچے اور آپریشن کی کمان سنبھالی۔

پولیس نے علاقے کو گھیرے میں لے کر کارروائی شروع کی، جس کے دوران سنگلاخ پہاڑوں اور جنگل میں کیے گئے کامیاب آپریشن کے نتیجے میں 3 دہشت گرد ہلاک ہو گئے۔ ہلاک دہشت گردوں کی لاشیں برآمد کر لی گئی ہیں۔ دہشت گردوں کی شناخت کا عمل جاری ہے جبکہ دیگر زخمی دہشت گردوں کی تلاش کے لیے آپریشن جاری ہے۔

آر پی او عباس مجید مروت نے کہا، “ہمارے بہادر جوانوں نے دہشت گردوں کا مقابلہ کیا اور انہیں کیفر کردار تک پہنچایا۔ ہم اپنے ہلاک اہلکاروں کی قربانیوں کو رائیگاں نہیں جانے دیں گے اور دہشت گردی کے خلاف ہماری جنگ جاری رہے گی۔”