کویت پر ایرانی حملے میں چینی کمپنی کی عمارت تباہ، ایک کارکن ہلاک

کویت سٹی (ڈیلی اردو/روئٹرز) ایران جنگ میں تہران کی طرف سے جمعرات 30 جولائی کی صبح شمالی کویت پر کیے گئے ایک حملے کی زد میں ایک چینی کمپنی کی عمارت بھی آ گئی، جس کے نتیجے میں یہ بلڈنگ جزوی طور پر تباہ ہو گئی اور ایک کارکن ہلاک ہو گیا۔

خلیجی ریاست کویت کی وزارت دفاع کی طرف سے سوشل میڈیا پلیٹ فارم ایکس پر جاری کردہ ایک بیان میں کہا گیا کہ اس ایرانی حملے میں چینی کمپنی کی عمارت کو شدید نقصان پہنچا۔ کویتی حکام نے اس حملے کی مزید کوئی تفصیلات نہیں بتائیں۔

نیوز ایجنسی روئٹرز کی رپورٹوں کے مطابق کویت پر اس تازہ ایرانی حملے سے قبل مشرق وسطیٰ کی ریاست اردن کی فضائی دفاعی فورسز نے یہ اعلان کیا تھا کہ انہوں نے پانچ ایسے میزائلوں کو فضا میں ہی تباہ کر دیا، جو ایران سے اردن پر حملوں کے لیے لانچ کیے گئے تھے۔

اردن کی نیوز ایجنسی پیٹرا کے مطابق ان ایرانی میزائل حملوں سے اردن میں کوئی شخص ہلاک یا زخمی نہیں ہوا۔

اس سے قبل جمعرات ہی کے روز امریکہ کی فوج کی مرکزی کمان (سینٹ کام) کی طرف سے ایک بیان میں کہا گیا تھا کہ اردن میں ایک امریکی فوجی اڈے پر کیے گئے تازہ ایرانی حملوں کے جواب میں ’’ایران کے خلاف فضائی حملوں کی ایک بڑی لہر مکمل‘‘ کر لی گئی۔

سینٹکام کے بیان کے مطابق ان فضائی حملوں کے دوران ایران میں پاسداران انقلاب کور سے وابستہ ’’درجنوں اہداف کو کامیابی سے نشانہ‘‘ بنایا گیا۔ ان میں مبینہ طور پر ملٹری کمانڈ سینٹرز اور میزائل اور ڈرونز لانچ کرنے والی سائٹس بھی شامل تھیں۔