کیچ میں سکیورٹی فورسز کا آپریشن، بلوچ لبریشن فرنٹ کا سرغنہ عصمی عرف وفا ہلاک

کوئٹہ (ڈیلی اردو) بلوچستان کے ضلع کیچ کے علاقے ہوشاب میں سکیورٹی فورسز سے مقابلے میں بلوچ لبریشن فرنٹ بی ایل اے کا سرغنہ عصمی عرف وفا مارا گیا۔

12اور 13 مئی کو بلوچستان کے علاقے ہوشاب میں سیکیورٹی فورسز کی جانب سے دہشتگردوں کے خلاف آپریشن کیا گیا۔ دوران آپریشن مارے جانے والے 6 دہشت گردوں میں کالعدم بلوچستان لبریشن فرنٹ کا اہم سرغنہ عصمی عرف وفا بھی شامل ہے۔

عصمی عرف وفا سیکیورٹی فورسز اور شہریوں کیخلاف کارروائیوں، بھتہ خوری، قتل و غارت اور اغوا برائے تاوان کی متعدد وارداتوں میں انتہائی مطلوب تھا۔

ہلاک دہشتگرد نے اپریل 2019 میں مسافروں سے بھری بس پر بُوزی ٹاپ پر حملہ کر کے بھاری جانی و مالی نقصان کیا تھا۔ جون 2021 میں ہوشاب میں سیکیورٹی فورسز کی پوسٹ جبکہ نومبر میں ہوشاب ہی میں سیکیورٹی فورسز کے ساتھ شدید جھڑپ کا بھی حصہ بنا۔

مئی 2022 میں بھی عصمی عرف وفا نے ہوشاب میں فائرنگ کے متعدد واقعات میں سیکیورٹی فورسز کو نشانہ بنایا۔ افواج پاکستان عوام کی مدد سے دہشت گردی کی لعنت کو جڑ سے اکھاڑ پھینکنے کے لیے پر عزم ہیں۔