کیچ میں کالعدم بلوچ لبریشن آرمی کا اہم کمانڈر جمیل عرف ٹیٹک ہلاک

کوئٹہ (ڈیلی اردو) پاکستان کے شورش زدہ صوبے  بلوچستان میں دہشت گردی کی متعدد کارروائیاں کرنے والا کالعدم بلوچ لبریشن آرمی (بی ایل اے) کا انتہائی مطلوب کمانڈر جمیل عرف ٹیٹک مارا گیا ہے۔

سرکاری ٹی وی چینل پاکستان ٹیلی ویژن نیوز کے مطابق سیکیورٹی ذرائع نے جمیل عرف ٹیٹک کی ہلاکت کی مصدقہ اطلاعات کی تصدیق کی ہے۔ رپورٹ کے مطابق جمیل ضلع پنجگور کا رہائشی تھا اور پنجگور، بلیدہ سمیت مختلف علاقوں میں دہشت گردانہ کارروائیوں میں سرگرم رہا۔

ذرائع کے مطابق جمیل عرف ٹیٹک 2022 میں پنجگور ہیڈکوارٹر پر حملے سمیت کئی بڑی کارروائیوں میں ملوث تھا۔

اس سے قبل وزیراعلیٰ بلوچستان سرفراز بگٹی نے صوبے میں بغاوت کے تاثر کو مسترد کرتے ہوئے کہا تھا کہ بلوچستان میں امن و امان کی بگڑتی صورتحال کے پیچھے بھارت کی حمایت یافتہ نام نہاد علیحدگی پسند تحریکیں ہیں۔

ان کا کہنا تھا کہ “یہ کوئی عوامی بغاوت نہیں بلکہ ریاست مخالف عناصر کی کارروائیاں ہیں جن کا مقصد پاکستان کو نقصان پہنچانا اور تقسیم کرنا ہے۔ بھارتی خفیہ ایجنسی را بلوچستان میں بدامنی کی اصل ذمہ دار ہے۔”