گنی بساؤ: فوج نے صدر کو معزول کر کے اقتدار پر قبضہ کر لیا

بساؤ (ڈیلی اردو ) مغربی افریقی ملک گنی بساؤ میں فوجی افسران کے ایک گروہ نے صدر عمرو سساکو ایمبالو کو معزول کر کے اقتدار پر قبضے کا اعلان کر دیا ہے۔ 

ریڈیو فرانس انٹرنیشنل کے مطابق اس اعلان سے قبل دارالحکومت کے اہم علاقوں میں فائرنگ کی اطلاعات سامنے آئیں۔

فوجی افسران نے کہا کہ انہوں نے ’’آرڈر کی بحالی کے لیے اعلیٰ فوجی کمان‘‘ تشکیل دے دی ہے، جو آئندہ نوٹس تک اس مغربی افریقی ملک کا نظم و نسق سنبھالے گی۔

یہ پیش رفت اُس وقت سامنے آئی ہے جب الیکشن کمیشن جمعرات کو انتہائی سخت مقابلے والے صدارتی انتخاب کے عبوری نتائج جاری کرنے والا تھا۔

موجودہ صدر عمرو سساکو ایمبالو اور اُن کے اہم حریف فرنینڈو ڈیاس، دونوں نے ہی اتوار کو ہونے والے پہلے مرحلے میں فتح کا دعویٰ کیا تھا۔ تاہم اب باغی فوجیوں کا کہنا ہے کہ انہوں نے الیکشن کے تمام عمل کو  منسوخ کر دیا ہے۔

عینی شاہدین کے مطابق بدھ کو فائرنگ الیکشن کمیشن کے ہیڈکوارٹرز، صدارتی محل اور وزارتِ داخلہ کے قریب سنی گئی اور یہ  فائرنگ تقریباً ایک گھنٹے تک جاری رہی۔