ہزارہ ڈویژن: تورغر میں لیویز صوبیدار کی گاڑی کے قریب دھماکا

تورغر (نمائندہ ڈیلی اردو) صوبہ خیبر پختونخوا کے ضلع تورغر کے ہیڈ کوارٹر جدباء میں لیویز پولیس فورس کے صوبیدار کی گاڑی پر ریموٹ بم دھماکہ ہوا ہے تاہم کوئی جانی نقصان نہیں ہوا

تورغر پولیس کے ترجمان وزیر خان کے مطابق صوبیدار گل فراز اپنی گاڑی میں گھر سے دفتر کی جانب گامزن تھے، جب ان کی گاڑی جدباء میرا کے مقام پر پہنچا تو ریموٹ کنٹرول کے ذریعے ایک بم دھماکا ہوا۔

تورغر پولیس کے مطابق دھماکے میں ایس ڈی پی او محفوظ رہے کیونکہ جس جگہ پارکنگ میں بم لگایا گیا تھا، وہاں سے وہ پہلے ہی اپنی گاڑی پر نکل گئے تھے۔

پولیس ترجمان کا کہنا تھا کہ علاقے کو گھیرے میں لے لیا گیا ہے اور بم ڈسپوزل اسکواڈ دھماکے کی نوعیت کے بارے میں جاننے اور اس بات کا تعین کرنے کی کوشش کر رہا ہے کہ اس میں کون سا دھماکا خیز مواد استعمال کیا گیا۔

انہوں نے مزید کہا کہ ڈویژنل پولیس افسر بلال احمد (ڈی پی او) تورغر کی ہدایت پر ضلع میں اعلیٰ پولیس حکام کی سیکیورٹی بھی سخت کردی گئی ہے۔

ادھر کالعدم تنظیم تحریک طالبان پاکستان (ٹی ٹی پی) نے حملے کی ذمہ داری قبول کی ہے۔