ہنگو دہشتگردوں کےخلاف آپریشن: مسجد میں چھپے دہشتگردوں سے جھڑپ، 9 ہلاک، 4 سیکیورٹی اہلکار زخمی

پشاور (ڈیلی اردو)ضلع ہنگو کے علاقے شناوڑی زرگری میں خفیہ اطلاع پر سیکیورٹی فورسز اور پولیس نے غیر ملکی دہشتگردوں کے خلاف فیصلہ کن آپریشن کیا، جس میں شدید جھڑپ کے دوران 9 دہشتگرد ہلاک اور 8 زخمی ہو گئے، جبکہ لیفٹیننٹ کرنل، ڈی پی او، ایس ایچ او اور بم ڈسپوزل اسکواڈ کے انچارج سمیت چار اہلکار شدید زخمی ہوئے۔ دہشتگردوں کی فائرنگ سے چار سیکیورٹی گاڑیاں اور دو سرکاری ڈرون بھی تباہ ہو گئے۔

ریجنل پولیس آفیسر عباس مجید مروت کے مطابق کارروائی مصدقہ انٹیلیجنس رپورٹ پر کی گئی، جس میں بتایا گیا تھا کہ دہشتگرد مسجد عثمان غنی میں پناہ لیے ہوئے ہیں۔ جیسے ہی اہلکار مسجد کی جانب بڑھے، اندر سے اندھا دھند فائرنگ شروع کر دی گئی۔ اسی اثنا میں ایک دوسرا گروہ بھی گھات لگائے موجود تھا، جس نے پیچھے سے پولیس پارٹی پر حملہ کر دیا، اور یوں علاقہ میدان جنگ بن گیا۔

جھڑپ کے دوران ڈی پی او خالد خان کو چار گولیاں لگیں، جنہیں فوری طور پر سی ایم ایچ کوہاٹ منتقل کیا گیا، جہاں ان کی حالت خطرے سے باہر بتائی گئی ہے۔ لیفٹیننٹ کرنل لکھکر خان، ایس ایچ او نبی خان اور بم ڈسپوزل یونٹ کے انچارج بھی زخمی اہلکاروں میں شامل ہیں۔

آپریشن مکمل ہونے پر علاقے کو کلیئر قرار دے دیا گیا ہے۔ آر پی او کے مطابق ہنگو میں سیکیورٹی کے مزید سخت اقدامات کیے گئے ہیں تاکہ کسی ممکنہ ردعمل کو ناکام بنایا جا سکے۔