ہنگو میں ایف سی قلعہ پر پاکستانی طالبان کا حملہ، 3 اہلکار ہلاک، 18 زخمی

 ہنگو (نمائندہ ڈیلی اردو) خیبر پختونخوا کے ضلع ہنگو کے علاقے دوآبہ میں فیڈرل کانسٹیبلری (ایف سی) کے قلعہ پر دہشت گردوں کے حملے میں فیڈرل ریزرو پولیس کے 3 اہلکار ہلاک اور 18 زخمی ہوگئے، جبکہ جوابی کارروائی میں ایک سہولت کار سمیت 5 دہشت گرد مارے گئے۔

ڈسٹرکٹ پولیس افسر (ڈی پی او) پاکستان کے شورش زدہ صوبے خیبر پختونخوا کے ضلع ہنگو محمد خالد خان کے مطابق اتوار کی صبح پاکستانی طالبان نے تھانہ دوآبہ کی حدود طورہ وڑی میں قائم ایف سی قلعہ کو بھاری ہتھیاروں سے نشانہ بنایا۔ حملے کے نتیجے میں فیڈرل ریزرو پولیس کے 3 اہلکار ہلاک اور 18 زخمی ہوگئے۔

ڈی پی او نے ڈیلی اردو کو  بتایا کہ فورسز کی بھرپور جوابی کارروائی میں سہولت کار سمیت 5 دہشت گرد مارے گئے۔ ان کے مطابق سہولت کار دہشت گردوں کے ساتھ ہی موجود تھا۔ کارروائی کے بعد پولیس اور ایف سی نے علاقے میں سرچ اینڈ سٹرائیک آپریشن شروع کردیا ہے تاکہ مزید سہولت کاروں کو گرفتار کیا جا سکے۔

انہوں نے مزید کہا کہ دہشت گرد رات کی تاریکی کا فائدہ اٹھاتے ہوئے اپنے ساتھیوں کی لاشیں ساتھ لے گئے۔

زخمی اہلکاروں کو ابتدائی طبی امداد کے بعد سی ایم ایچ ٹل منتقل کردیا گیا ہے جبکہ ہلاک اہلکاروں کی لاشوں کو ڈسٹرکٹ ہیڈکوارٹر اسپتال ہنگو پہنچایا گیا ہے۔ واقعے کے بعد علاقے میں سیکیورٹی مزید سخت کر دی گئی ہے۔

دریں اثناء وفاقی وزیر داخلہ محسن نقوی نے حملے میں ہلاک ہونے والے اہلکاروں کو خراج عقیدت پیش کیا۔ اپنے بیان میں انہوں نے کہا کہ "بہادر جوانوں نے جان دے کر بھارتی اسپانسرڈ دہشت گردوں کا حملہ ناکام بنایا۔ شہدا کی قربانی کو سلام پیش کرتے ہیں، یہ قربانیاں رائیگاں نہیں جائیں گی۔"

وزیر داخلہ نے زخمی اہلکاروں کی جلد صحتیابی کے لیے دعا بھی کی۔