یمنی حوثی رہنما عیدروس الزبیدی فرار، یو اے ای پہنچ گئے، سعودی اتحاد

ریاض (ڈیلی اردو) یمن میں حوثی باغیوں کے خلاف سرگرم سعودی قیادت میں قائم عسکری اتحاد نے جمعرات، 8 جنوری کو اعلان کیا کہ یمن کے علیحدگی پسند رہنما عیدروس الزبیدی فرار ہو کر متحدہ عرب امارات (یو اے ای) پہنچ گئے ہیں۔ یہ واقعہ ان کے وسیع علاقے پر قبضے اور آزادی کی طرف پیش رفت کی کوشش کے بعد سامنے آیا ہے۔

عیدروس الزبیدی پر بدھ کے روز یمن کی صدارتی قیادت کونسل سے غداری کے سنگین الزامات عائد کر کے انہیں نکال دیا گیا تھا۔ اس کے علاوہ، ریاض میں مذاکرات میں شرکت سے انکار کرنے پر سعودی قیادت میں قائم اتحاد نے ان کے آبائی صوبے پر بمباری بھی کی تھی۔

اتحاد کے بیان میں کہا گیا:“قابل اعتماد انٹیلیجنس معلومات کے مطابق عیدروس الزبیدی اور دیگر افراد رات کے اندھیرے میں فرار ہو گئے ہیں۔”

بیان میں ان کے فرار کے راستے کی تفصیلات بھی فراہم کی گئی ہیں۔ بتایا گیا ہے کہ عدن سے وہ کشتی اور جہاز کے ذریعے صومالی لینڈ اور صومالیہ کے راستے متحدہ عرب امارات پہنچے۔

بدھ کو آدھی رات کے بعد الزبیدی عدن سے صومالی لینڈ کے شہر بربرہ روانہ ہوئے، جہاں سے متحدہ عرب امارات کے افسران کی نگرانی میں روسی ساختہ الیوشین طیارے کے ذریعے موغادیشو پہنچے۔ موغادیشو سے وہ ابوظہبی کے ایک فوجی ہوائی اڈے کے لیے روانہ ہوئے اور بدھ کی شام وہاں پہنچ گئے۔

متحدہ عرب امارات کی وزارت خارجہ نے اس معاملے پر فوری طور پر کوئی بیان جاری نہیں کیا۔

یاد رہے کہ گزشتہ ماہ یمن کی جنوبی عبوری کونسل کی جارحانہ سرگرمیوں نے جزیرہ نما عرب کے غریب ترین ملک یمن میں نئی افراتفری پیدا کر دی تھی۔ اس کے بعد خلیجی اتحادی ممالک، خاص طور پر سعودی عرب اور متحدہ عرب امارات، کے درمیان یمن کے مستقبل اور حکمت عملی کے حوالے سے اختلافات بھی نمایاں ہوئے تھے۔