یمن: تعز میں جھڑپیں، حوثی باغیوں کے 23 اہلکار ہلاک و زخمی ہونے کا دعویٰ

صنعاء (ڈیلی اردو) یمن کے تعز فوجی محور کی جانب سے دعویٰ کیا گیا ہے کہ شمال مشرقی تعز کے محاذوں پر یمنی فوج اور حوثی باغیوں کے درمیان شدید جھڑپوں کے دوران 23 حوثی اہلکار ہلاک اور زخمی ہوئے۔

فوجی حکام کے مطابق جھڑپیں کلابہ محاذ کے الصفا علاقے میں اس وقت شروع ہوئیں جب حوثی باغیوں نے یمنی فوج کی پوزیشنز پر حملہ کیا۔ لڑائی بعد میں شہر کے شمال مشرقی محاذ کے دیگر علاقوں تک پھیل گئی۔

بیان میں کہا گیا ہے کہ جھڑپوں کے دوران مختلف نوعیت کے ہتھیار استعمال کیے گئے، جبکہ یمنی فوج کے مطابق کارروائی میں حوثی باغیوں کے 8 اہلکار ہلاک اور 15 زخمی ہوئے۔

یہ جھڑپیں ایسے وقت میں ہوئی ہیں جب چوتھے فوجی علاقے کے کمانڈر نے تعز کے محاذوں کا دورہ کیا۔ رپورٹ کے مطابق 2015 میں یمن میں جنگ شروع ہونے کے بعد یہ اپنی نوعیت کا پہلا دورہ ہے۔

حوثی باغیوں کی جانب سے جھڑپوں اور جانی نقصان سے متعلق یمنی فوج کے دعوے پر تاحال کوئی مؤقف سامنے نہیں آیا، اس لیے ہلاکتوں اور زخمیوں کی تعداد کی آزادانہ تصدیق نہیں ہوسکی۔