یمن: حوثی باغیوں کا اسلحہ و فوجی رسد کا ذمہ دار کمانڈر ڈرون حملے میں ہلاک

صنعاء(ڈیلی اردو) یمن کے صوبہ الجوف میں حوثی باغیوں کے ایک اہم کمانڈر سجاد مطہر ڈرون حملے میں ہلاک ہوگئے۔ یہ کارروائی یمنی مسلح افواج کی جانب سے کیے گئے ڈرون حملوں کے نتیجے میں ہوئی۔

دفاعی و سیکیورٹی امور کے ماہر پلیٹ فارم ’’ڈیفنس لائن‘‘ کے مطابق سجاد مطہر کو حوثی باغیوں نے بریگیڈیئر کے عہدے پر تعینات کر رکھا تھا اور وہ چھٹے فوجی علاقے میں اسلحے اور فوجی رسد کی نگرانی کی ذمہ داری انجام دے رہے تھے۔

رپورٹ کے مطابق سجاد مطہر کا تعلق صنعاء کے علاقے بنی حشی سے تھا، جبکہ چھٹے فوجی علاقے میں صعدہ، عمران اور الجوف کے علاقے شامل ہیں۔ ان کی ہلاکت ایسے وقت میں ہوئی ہے جب حوثی باغیوں کے خلاف یمنی فورسز کی ڈرون کارروائیوں اور دیگر فوجی آپریشنز میں اضافہ دیکھا جا رہا ہے۔

ذرائع کے مطابق یمنی فورسز کی جانب سے ڈرون نگرانی اور حملوں کے علاوہ توپ خانے اور میزائل کارروائیوں نے حوثی باغیوں کی نقل و حرکت پر دباؤ بڑھایا ہے، جس کے باعث گروپ کو اپنی عسکری تعیناتی اور حکمت عملی میں تبدیلیاں کرنا پڑ رہی ہیں۔