یمن: سعودی اتحاد کی کارروائیوں میں 92 حوثی باغی ہلاک

صنعا (ڈیلی اردو) یمن میں عرب فوجی اتحاد نے 24 گھنٹے کے دوران مختلف کارروائیوں میں 90 سے زائد حوثی باغیوں کو ہلاک کردیا ہے۔

فرانسیسی خبر رساں ادارے اے ایف پی کے مطابق عرب فوجی اتحاد کی جانب سے جاری بیان میں کہا گیا ہے کہ 24 گھنٹے کے دوران یمن کے علاقے الجوبہ اور القصرا میں مختلف کارروائیوں میں 92 حوثی باغی ہلاک جبکہ 16 فوجی گاڑیوں کو تباہ کیا گیا ہے۔

#BREAKING More than 90 Yemen rebels killed near Marib: Saudi-led coalition pic.twitter.com/bgJJE20yux

— AFP News Agency (@AFP) October 22, 2021

جمعرات کو عرب فوجی اتحاد نے ایرانی حمایت یافتہ حوثی باغیوں کے خطرات کے جواب میں یمن کے دارالحکومت صنعا میں فوجی آپریشن شروع کردیا ہے۔

فوجی اتحاد کا کہنا ہے کہ یمن میں انسانی حقوق کی خلاف ورزیاں ہوتی رہیں تو انسانی حقوق کے عالمی قوانین کی روشنی میں حوثیوں کے خلاف سخت کارروائی کریں گے، گزشتہ چند ماہ کے دوران یمن میں انسانی حقوق کی سنگین خلاف ورزیوں پر انتہائی صبر و تحمل کا مظاہرہ کیا ہے۔

عرب اتحاد کے ترجمان ترکی المالکی کا کہنا تھا کہ عالمی قانون کی روشنی میں آپریشن شروع کیا گیا ہے جس میں عام شہریوں کو نقصان سے بچانے کے لیے حفاظتی اقدامات کیے گئے ہیں۔