آبنائے ہرمز میں ایرانی تجارتی جہاز پر حملہ، ایک ہلاک، 3 زخمی

تہران(ڈیلی اردو) جنوبی ایران کے قریب آبنائے ہرمز میں ایک ایرانی تجارتی جہاز کو نامعلوم نوعیت کے حملے کا نشانہ بنایا گیا، جس کے نتیجے میں ایک شخص ہلاک جبکہ 3 افراد زخمی ہوگئے۔

ایرانی سرکاری ذرائع کے مطابق واقعہ اتوار کی صبح تقریباً 5 بجے قشم جزیرے کے قریب پیش آیا۔ جہاز پر حملہ ہنکام جزیرے اور شیب دراز کے ساحلی علاقے کے درمیان سمندری حدود میں ہوا۔

ایرانی خبر رساں ادارے تسنیم کے مطابق جہاز کو لگنے والے نامعلوم پرتابی ہتھیار کے ماخذ اور نوعیت کا فوری طور پر تعین نہیں ہوسکا۔

مقامی حکام کے مطابق قشم کے اطراف رات کے دوران متعدد دھماکوں کی آوازیں بھی سنی گئی تھیں، تاہم ان واقعات اور تجارتی جہاز پر حملے کے درمیان تعلق کے بارے میں فوری طور پر کوئی حتمی وضاحت سامنے نہیں آئی۔

آبنائے ہرمز خطے میں عالمی بحری تجارت اور توانائی کی ترسیل کے لیے انتہائی اہم سمندری گزرگاہ ہے، جس کے باعث یہاں پیش آنے والا کوئی بھی سیکیورٹی واقعہ عالمی سطح پر تشویش کا باعث بن سکتا ہے۔