آبنائے ہرمز میں ایرانی ڈرونز مار گرائے گئے، امریکی سینٹرل کمانڈ

واشنگٹن (ڈیلی اردو) امریکی سینٹرل کمانڈ (سینٹکام) نے کہا ہے کہ اس کی افواج نے آبنائے ہرمز میں ایران کی جانب سے بھیجے گئے حملہ آور ڈرونز کو مار گرایا ہے۔

سینٹکام کی جانب سے سوشل میڈیا پلیٹ فارم ایکس پر جاری بیان کے مطابق ایران نے آبنائے ہرمز سے گزرنے والے تجارتی جہازوں کو نشانہ بنانے کی کوشش میں کئی یک طرفہ حملہ آور ڈرونز لانچ کیے تھے۔

بیان میں کہا گیا ہے کہ امریکی افواج نے گزشتہ چند گھنٹوں کے دوران تمام ڈرونز کو مار گرایا، جبکہ آبنائے ہرمز سے تجارتی جہازوں کی آمد و رفت معمول کے مطابق جاری ہے۔

دوسری جانب اس معاملے سے واقف ذرائع نے خبر رساں ادارے روئٹرز کو بتایا کہ امریکی افواج نے آبنائے ہرمز کی جانب بڑھنے والے متعدد ایرانی ڈرونز کو نشانہ بنایا۔ ذرائع کے مطابق یہ ڈرون تجارتی جہاز رانی کے لیے خطرہ سمجھے جا رہے تھے۔

تاحال ایران کی جانب سے اس حوالے سے کوئی باضابطہ ردعمل سامنے نہیں آیا۔