آبنائے ہرمز میں نامعلوم میزائل نما گولے سے تیل بردار جہاز متاثر، انجن روم میں آگ بھڑک اٹھی

تہران(ڈیلی اردو) آبنائے ہرمز سے گزرنے والے ایک تیل بردار جہاز کو نامعلوم سمت سے آنے والے گولے سے نشانہ بنائے جانے کے بعد اس کے انجن روم میں آگ لگ گئی۔ برطانوی میری ٹائم ٹریڈ آپریشنز ادارے کے مطابق واقعے میں جہاز کے عملے کا کوئی رکن زخمی نہیں ہوا، تاہم جہاز کو پہنچنے والے نقصان اور سمندری ماحول پر ممکنہ اثرات کا تعین نہیں ہوسکا۔

عرب میڈیا کے مطابق یہ واقعہ پیر کے روز پیش آیا، جب جہاز آبنائے ہرمز سے باہر نکل رہا تھا۔ جہاز کے کپتان نے اطلاع دی کہ ایک نامعلوم گولہ جہاز کے پہلو سے ٹکرایا، جس کے نتیجے میں انجن روم میں آگ بھڑک اٹھی۔ واقعے کے بعد متعلقہ حکام نے تحقیقات شروع کردی ہیں، جبکہ حملے کے ذمہ داروں اور گولے کے ماخذ سے متعلق تفصیلات سامنے نہیں آئیں۔

آبنائے ہرمز میں تجارتی جہازوں کو نشانہ بنانے کے واقعات میں اضافے کے باعث خطے میں بحری آمدورفت کی سلامتی سے متعلق خدشات بڑھ گئے ہیں۔ یہ اہم آبی گزرگاہ خلیج فارس کو خلیج عمان اور بحیرۂ عرب سے ملاتی ہے اور عالمی توانائی کی ترسیل کے لیے غیر معمولی اہمیت رکھتی ہے۔

جنگ سے پہلے دنیا کی سمندری راستوں سے ہونے والی تیل کی تجارت کا تقریباً پانچواں حصہ آبنائے ہرمز سے گزرتا تھا۔ ایران اور امریکہ کے درمیان جاری کشیدگی کے تناظر میں اس گزرگاہ میں کسی بھی حملے سے عالمی تیل کی ترسیل، جہاز رانی اور توانائی کی قیمتوں پر اثرات مرتب ہونے کا خدشہ رہتا ہے۔