آبنائے ہرمز کو جلد امریکی علاقہ قرار دونگا، ڈونلڈٹرمپ

واشنگٹن(ڈیلی اردو)  امریکی صدر ڈونلڈ ٹرمپ نے کہا ہے کہ امریکا جلد آبنائے ہرمز کو امریکی علاقہ قرار دینے سے متعلق اعلان کرے گا، جس سے پہلے ہی کشیدہ مشرق وسطیٰ کی صورتحال میں مزید تناؤ پیدا ہونے کا امکان ہے۔

فاکس نیوز کو دیے گئے ایک انٹرویو میں ٹرمپ نے بتایا کہ واشنگٹن ایران کے خلاف معاشی دباؤ میں مزید اضافہ کرنے کی تیاری کر رہا ہے۔ ان کے مطابق پابندیوں اور دیگر معاشی اقدامات کا مقصد ایران کو جنگ کے خاتمے پر آمادہ کرنا ہے۔

امریکی صدر نے آبنائے ہرمز کے حوالے سے بھی جلد کسی اہم پیش رفت کا عندیہ دیا، تاہم انہوں نے اس اعلان کی مزید تفصیلات بیان نہیں کیں۔

آبنائے ہرمز عالمی تجارت کے لیے انتہائی اہم بحری گزرگاہ ہے، جہاں سے دنیا کے بڑے حصے کی تیل کی ترسیل ہوتی ہے۔ اس لیے اس راستے سے متعلق امریکی صدر کے بیان کو خطے کی موجودہ کشیدہ صورتحال میں خاص اہمیت دی جا رہی ہے۔

ادھر امریکی وزیر خزانہ اسکاٹ بیسنٹ نے کہا ہے کہ واشنگٹن آئندہ ہفتے کے آغاز میں ایران کے خلاف غیر معمولی نوعیت کی سخت پابندیاں اور معاشی اقدامات متعارف کرانے کی تیاری کر رہا ہے۔