آرمی چیف جنرل قمر جاوید باجوہ نے عید لائن آف کنٹرول پر جوانوں کے ساتھ منائی

راولپنڈی (ڈیلی اردو) آرمی چیف جنرل قمر جاوید باجوہ نے کہا ہے کہ اپنے کشمیری بہن بھائیوں کے ساتھ کھڑے ہیں، ہم کسی بھی بھارتی سازش کو ناکام بنانے کے لیے پر عزم ہیں۔

پاک فوج کے تعلقات عامہ کے شعبے آئی ایس پی آر کے مطابق آرمی چیف جنرل قمر جاوید باجوہ نے عید الاضحیٰ لائن آف کنٹرول پر فوجی جوانوں کے ساتھ منائی۔آرمی چیف جنرل قمر جاوید باجوہ نے لائن آف کنٹرول کے باغ سیکٹر کا دورہ بھی کیا۔

اس موقع پر ان کا کہنا تھا کہ مقبوضہ کشمیر سے توجہ ہٹانے کے لیے بھارت ایل او سی پر کچھ بھی کر سکتا ہے، حکومت نے کشمیر کے بحران سے نمٹنے کے لیے کثیر جہتی کوششیں شروع کی ہیں، ہم بھارت کو مقبوضہ کشمیر میں جرائم چھپانے کا موقع فراہم نہیں کریں گے، تنازعہ کشمیر کے حل کے لیے ہماری خواہش اتنی ہی ہے، جتنی امن کے لیے ہے، ہمارا مذہب امن سکھاتا ہے لیکن ساتھ ہی سچ کےساتھ کھڑا ہونا اور قربانی دینا سکھاتا ہے، ہم ایسی کسی بھی بھارتی سازش کو ناکام بنانے کے لیے پر عزم ہیں، اپنے کشمیری بہن بھائیوں کے ساتھ کھڑے ہیں۔