آسام : جماعت المجاہدین بنگلہ دیش سے وابستہ نیٹ ورک کے 6 ملزمان گرفتار

آسام(ڈیلی اردو) گوہاٹی میں بھارتی قومی تحقیقاتی ایجنسی (این آئی اے) نے ممنوعہ دہشتگرد تنظیم جماعت المجاہدین بنگلہ دیش (جے ایم بی) سے مبینہ طور پر منسلک گروہ ’’امام محمودر قافلہ‘‘ کے خلاف کارروائی کرتے ہوئے آسام سے تعلق رکھنے والے 6 افراد کو دوبارہ گرفتار کرلیا۔

این آئی اے کے مطابق گرفتار کیے گئے افراد اس سے قبل ضمانت پر رہا ہو چکے تھے۔ ایجنسی کا دعویٰ ہے کہ مذکورہ گروہ بنگلہ دیش سے سرگرمیاں چلاتے ہوئے بھارت کی شمال مشرقی ریاستوں اور مغربی بنگال میں نوجوانوں کو مبینہ طور پر انتہا پسند نظریات کی طرف راغب کرنے اور تنظیم میں شامل کرنے کی کوشش کر رہا تھا۔

تحقیقاتی ادارے کے مطابق نیٹ ورک پر ’’غزوہ ہند‘‘ سمیت انتہا پسند نظریات کی تشہیر کا بھی الزام ہے۔ تفتیش میں یہ بات بھی سامنے آنے کا دعویٰ کیا گیا ہے کہ نوجوانوں تک رسائی اور انہیں انتہا پسند سرگرمیوں کی جانب راغب کرنے کے لیے ’’پورو آکاش‘‘ نامی ڈیجیٹل پلیٹ فارم استعمال کیا جاتا تھا۔

این آئی اے اس معاملے میں اس سے قبل 11 مبینہ ملزمان کے خلاف گوہاٹی کی خصوصی این آئی اے عدالت میں فردِ جرم بھی عائد کر چکی ہے۔ ملزمان کے خلاف بھارتیہ نیائے سنہتا (بی این ایس) اور غیر قانونی سرگرمیوں کی روک تھام کے قانون (یو اے پی اے) کی مختلف دفعات کے تحت کارروائی کی گئی ہے، جبکہ تازہ گرفتاریوں کے بعد تحقیقات مزید آگے بڑھائی جا رہی ہیں۔