آسٹریلیا کا داعش سے منسلک 34 افراد کو شام سے واپس نہ لانے کا اعلان

میلبورن (ڈیلی اردو) آسٹریلیا کے وزیرِ اعظم انتھونی البنیزی نے منگل کو کہا کہ ان کی حکومت شام سے 34 خواتین اور بچوں کے ایک گروہ کو، جن کے مبینہ طور پر شدت پسند تنظیم داعش سے تعلقات ہیں، واپس نہیں لائے گی۔

11 خاندانوں سے تعلق رکھنے والی یہ خواتین اور بچے شام سے آسٹریلیا روانہ ہونے والے تھے، لیکن حکام کے مطابق پیر کے روز شامی حکام نے طریقہ کار کے مسائل کی وجہ سے انہیں واپس روج حراستی کیمپ بھیج دیا۔

2019 میں داعش کے زوال کے بعد سے شامی کیمپوں سے حکومتی مدد کے ذریعے صرف دو گروہوں کو آسٹریلیا واپس لایا گیا ہے۔ دیگر کچھ آسٹریلوی شہری بغیر حکومتی مدد کے بھی واپس آ چکے ہیں۔

البنیزی نے میلبورن میں آسٹریلین براڈکاسٹنگ کارپوریشن سے گفتگو کرتے ہوئے کہا، ’’ہم کسی قسم کی کوئی مدد فراہم نہیں کر رہے اور نہ ہی ہم لوگوں کو واپس لا رہے ہیں۔‘‘

آسٹریلوی قانون کے تحت 2014 سے 2017 کے درمیان بغیر کسی جائز وجہ کے شام کے شہر رقہ اور دیگر علاقوں کا سفر کرنا جرم تھا، جس کی سزا 10 سال تک قید ہو سکتی تھی۔

البنیزی نے مزید کہا، ’’یہ بدقسمتی کی بات ہے کہ بچے بھی اس صورتحال سے متاثر ہو رہے ہیں، لیکن ہم کوئی مدد فراہم نہیں کر رہے۔ اور اگر کوئی کسی طرح آسٹریلیا واپس آنے میں کامیاب ہو جاتا ہے تو اگر کسی قانون کی خلاف ورزی ہوئی ہے تو اسے قانون کا سامنا کرنا پڑے گا۔‘‘