اسرائیل کا دمشق ایئرپورٹ پر فضائی حملہ، 5 شامی فوجی ہلاک

دمشق (ڈیلی اردو/رائٹرز) اسرائیل نے شام کے دمشق کے بین الاقوامی ہوائی اڈے اور دارالحکومت کے جنوب میں دیگر مقامات پر فضائی حملہ کیا، جس میں 5 فوجی ہلاک اور عمارتوں کو نقصان پہنچا۔

برطانوی خبرررساں ادارے رائٹرز کی رپورٹ کے مطابق وزارت دفاع کے ایک بیان میں کہا گیا کہ شام کے ایئر ڈیفنس نے حملے کو روک دیا اور زیادہ تر میزائلوں کو مار گرانے میں کامیاب ہو گئے۔

البتہ فوری طور پر اس بات کی تصدیق نہیں ہو سکی کہ کیا اس حملے سے ہوائی اڈے کی کارروائیاں متاثر ہوئی ہیں۔

اسرائیلی فوج نے کہا کہ وہ ان غیر ملکی رپورٹس پر کوئی تبصرہ نہیں کرے گی۔

علاقائی سفارتی اور انٹیلی جنس ذرائع نے رائٹرز کو بتایا کہ اسرائیل نے شام اور لبنان میں حزب اللہ سمیت اتحادیوں کو ہتھیار پہنچانے کے لیے ایران کی فضائی سپلائی لائنوں کے بڑھتے ہوئے استعمال کو روکنے کے لیے شام کے ہوائی اڈوں پر حملے تیز کر دیے ہیں۔

تہران نے زمینی منتقلی میں رکاوٹوں کے بعد شام میں اپنی افواج اور اتحادی جنگجوؤں کو فوجی ساز و سامان پہنچانے کے لیے ہوائی نقل و حمل کو ایک زیادہ قابل اعتماد ذریعے کے طور پر اپنایا ہے۔

خیال رہے کہ سال 2011 میں شام کے صدر بشار الاسد کے خلاف ہونے والے مظاہروں کے بعد اب تک لاکھوں افراد ہلاک اور لاکھوں بے گھر ہو چکے ہیں۔

یہ صورتحال اتنی بگڑی کہ خانہ جنگی کی شکل اختیار کر گئی جس نے بیرونی طاقتوں کو اپنی طرف متوجہ کیا اور شام کو مختلف کنٹرول کے علاقوں میں تبدیل کر دیا۔

ہفتہ کے روز ہونے والے اس حملے سے قبل رواں ماہ کے اوائل میں اسرائیل کی جانب سے ایک ہی ہفتے میں دو مرتبہ حلب کے بین الاقوامی ایئرپورٹ کو میزائل سے نشانہ بنایا گیا تھا۔

وزارت خارجہ نے اپنے بیان میں کہا کہ اسرائیلی فضائی بمباری کی وجہ سے ایئرپورٹ کے رن وے اور سروسز کو شدید نقصان پہنچا۔

بیان میں کہا گیا تھا کہ اسرائیل کی جانب سے فضائی حملے میں شام کی شہری آبادی کو نشانہ بنایا گیا، ایسے حملے بین الاقوامی قوانین کے مطابق جارحیت اور جنگی جرائم کے مترادف ہیں۔