اسرائیل کا غزہ میں بڑا فوجی آپریشن، سٹریٹیجک علاقوں پر قبضہ، 250 فلسطینی ہلاک

غزہ (ڈیلی اردو) اسرائیلی فوج نے غزہ کی پٹی میں ایک وسیع فوجی آپریشن کا آغاز کرتے ہوئے کئی سٹریٹیجک علاقوں پر قبضے کا اعلان کیا ہے۔ اسرائیلی دفاعی فورسز (IDF) نے جمعرات کو ایکس پر عبرانی زبان میں پیغام میں کہا کہ اس کے فوجی دستے حماس کو شکست دینے اور یرغمالیوں کی بازیابی کے لیے متحرک کیے گئے ہیں۔

فلسطینی حکام کے مطابق، جمعرات سے جاری اسرائیلی فضائی و زمینی حملوں میں اب تک کم از کم 250 افراد ہلاک ہو چکے ہیں، جن میں بڑی تعداد عام شہریوں کی بتائی جا رہی ہے۔ غزہ کی وزارتِ صحت اور سول ڈیفنس نے خدشہ ظاہر کیا ہے کہ ہلاکتوں کی تعداد مزید بڑھ سکتی ہے۔

جنگ بندی کی ناکامی اور شدید انسانی بحران

اسرائیل کی جانب سے یہ آپریشن دو ماہ کے سیزفائر کے خاتمے اور مارچ سے امدادی سامان کی ترسیل روکنے کے بعد شروع کیا گیا۔ امریکی صدر ڈونلڈ ٹرمپ نے جمعے کو اعتراف کیا کہ “غزہ میں بہت سے لوگ بھوکے اور پیاسے ہیں۔”

غزہ میں جاری انسانی بحران پر اقوامِ متحدہ کے حمایت یافتہ ایک حالیہ جائزے میں بتایا گیا ہے کہ علاقے کی آبادی قحط کے خطرے سے دوچار ہے۔ اقوام متحدہ کے انسانی حقوق کے سربراہ وولکر ٹرک نے خبردار کیا ہے کہ اسرائیل کی حالیہ کارروائیاں بین الاقوامی قانون کی خلاف ورزی شمار کی جا سکتی ہیں۔

آپریشن کی تفصیلات اور اہداف

ٹائمز آف اسرائیل کے مطابق اسرائیلی فوج اس آپریشن کے دوران غزہ کے کئی علاقوں پر قبضہ کرے گی، شہری آبادی کو جنوبی غزہ منتقل کیا جائے گا، حماس پر منظم حملے کیے جائیں گے، اور امدادی سامان پر حماس کے قبضے کو روکا جائے گا۔

اسرائیلی فوج کا دعویٰ ہے کہ اس نے گذشتہ 24 گھنٹوں میں “دہشتگردی کے 150 ٹھکانوں” کو نشانہ بنایا ہے۔ اسرائیلی وزیر اعظم بنیامن نتن یاہو پہلے ہی واضح کر چکے تھے کہ ان کی حکومت غزہ کے متعدد علاقوں پر قبضے کی تیاری کر رہی ہے۔ یہ آپریشن امریکی صدر ڈونلڈ ٹرمپ کے مشرق وسطیٰ کے دورے کی تکمیل کے بعد شروع کیا گیا۔

عالمی ردعمل اور سفارتی تناؤ

امریکی سیکریٹری خارجہ مارکو روبیو نے کہا ہے کہ واشنگٹن کو صورتحال پر “شدید تشویش” ہے۔ تاہم، تاحال امریکہ نے اسرائیلی کارروائیوں کو روکنے کے لیے کوئی عملی قدم نہیں اٹھایا۔

دوسری جانب جنگ بندی اور مذاکرات کی عالمی کوششیں اس نئے فوجی آپریشن کے آغاز کے ساتھ بظاہر ناکام ہو چکی ہیں۔ اسرائیل نے سرحدی علاقوں میں فوج کو ہائی الرٹ کر دیا ہے، جس سے خطے میں کشیدگی میں مزید اضافے کا خدشہ ہے۔

پس منظر: حماس کا حملہ اور یرغمالی

یہ آپریشن 7 اکتوبر 2023 کو حماس کے حملے کے بعد اسرائیل کی جانب سے شروع کی گئی وسیع فوجی مہم کا تسلسل ہے۔ حماس کی تحویل میں اب بھی 251 یرغمالیوں میں سے 57 افراد موجود ہیں، جن کی بازیابی کو اسرائیل اپنے حملوں کا جواز قرار دیتا ہے۔

دوحہ میں مذاکرات کے نئے دور کا اعلان

حماس کا کہنا ہے کہ غزہ میں جنگ ختم کرنے کے لیے ان کی جانب سے دوحہ میں مذاکرات کے نئے دور کا آغاز کیا گیا ہے۔

حماس کی جانب سے یہ اعلان اسرائیل کی جانب سے ایک بڑے فوجی حملے کے چند گھنٹے بعد سامنے آ گیا ہے۔

اس حوالے سے حماس کے سربراہ کے مشیر طاہر النونو نے بی بی سی کو بتایا کہ مذاکرات کا نیا دور سنیچر کے روز دوحہ میں باضابطہ طور پر شروع ہو چکا ہے۔

ان کے مطابق فریقین کی طرف سے کوئی پیشگی شرائط نہیں رکھی گئیں اور تمام امور پر بات چیت کے لیے تیار ہیں۔

اسرائیلی وزیر دفاع اسرائیل کاٹز نے کہا کہ حماس کی جانب سے مذاکرات کار قطر میں بالواسطہ مذاکرات میں اس مقصد سے واپس آئے ہیں کہ یرغمالیوں کے معاملے پر کوئی معاہدہ ہو سکے۔

اسرائیل کاٹز نے اس اقدام کو اس بے لچک مؤقف سے انحراف قرار دیا ہے جو ان کے مطابق حماس نے اب تک اختیار کیا ہوا تھا۔

یہ پیش رفت ایسے وقت میں سامنے آئی جب اسرائیلی فوج نے اپنے ایکس اکاؤنٹ پر کہا کہ وہ اس وقت تک کارروائیاں بند نہیں کریں گے جب تک کہ حماس ان کے لیے خطرہ نہ رہے اور ہمارے تمام یرغمالی گھروں کو واپس نہ آ جائیں۔‘

اسرائیلی فوج نے دعویٰ کیا ہے کہ اس نے 24 گھنٹوں کے دوران غزہ کی پٹی میں 150 سے زائد دہشت گرد اہداف پر حملہ کیا ہے۔‘