اسرائیل کو یرغمالیوں کی رہائی کیلئے غزہ پر بمباری روکنا ہوگی، امریکی وزیر خارجہ روبیو

واشنگٹن (ڈیلی اردو) امریکی وزیرِ خارجہ مارکو روبیو نے کہا ہے کہ فلسطینی گروپ حماس کی جانب سے یرغمالیوں کی رہائی اس وقت تک ممکن نہیں، جب تک اسرائیل غزہ پر اپنی فضائی کارروائیاں بند نہیں کرتا۔

اتوار کو سی بی ایس نیوز کے پروگرام فیس دی نیشن میں گفتگو کرتے ہوئے روبیو نے کہا، ’’میرے خیال میں اسرائیلی حکام اور سبھی اس بات کو تسلیم کرتے ہیں کہ جب بمباری جاری ہو تو یرغمالیوں کی رہائی ممکن نہیں، اس لیے حملے رکنے ہوں گے۔‘‘

انہوں نے مزید کہا، ’’یہ ممکن نہیں کہ جنگ جاری رہے اور اسی دوران رہائی کا عمل بھی ہو۔‘‘

روبیو نے امید ظاہر کی ہے کہ اسرائیل اورحماس کے درمیان ایسا معاہدہ جلد طے پا جائے گا جس کے تحت غزہ میں یرغمال بنائے گئے افراد کو رہا کیا جا سکے۔

انہوں نے اے بی سی نیوز سے گفتگو میں کہا، ’’یہ تمام بات چیت اس وقت بھی جاری ہے جب میں آپ سے بات کر رہا ہوں۔ ہمیں امید ہے کہ یہ عمل بہت جلد، اسی ہفتے کے آغاز میں مکمل ہو جائے گا۔‘‘

روبیو نے مزید کہا، ’’اگرچہ یہ کہنا مشکل ہے کہ کب تک، لیکن یہ عمل ہفتوں یا کئی دنوں تک نہیں چل سکتا ، ہم چاہتے ہیں کہ یہ بہت تیزی سے مکمل ہو۔‘‘