اسرائیلی حملوں میں ایران کے 300 میزائل لانچرز اور مجلس خبرگانِ رہبری کی عمارت تباہ

تہران (ڈیلی اردو) اسرائیلی فوج نے اپنے بیان میں کہا ہے کہ ایران میں تقریباً 300 میزائل لانچرز تباہ کر دیے گئے ہیں جبکہ لبنان میں بھی متعدد اہداف کو نشانہ بنایا گیا ہے۔

بیان کے مطابق گزشتہ 24 گھنٹوں کے دوران سیکڑوں لڑاکا طیارے ایران اور لبنان میں بیک وقت مختلف مقامات پر کارروائیاں کر رہے ہیں۔ اسرائیلی فوج کا کہنا ہے کہ ہفتے کے روز شروع ہونے والی کارروائی کے بعد سے ایران میں چار ہزار ہتھیار استعمال کیے جا چکے ہیں۔

اسرائیلی فضائیہ کے مطابق ایرانی حکومت کے بیلسٹک میزائل نظام اور فضائی دفاعی ڈھانچوں پر حملے جاری ہیں۔

قم میں مجلس خبرگانِ رہبری کی عمارت تباہ

ایران کے شہر قم میں مجلس خبرگانِ رہبری کی عمارت کو اسرائیلی فضائی حملے میں مکمل طور پر تباہ کیے جانے کی اطلاعات سامنے آئی ہیں۔ مجلس خبرگانِ رہبری وہ آئینی ادارہ ہے جو سپریم لیڈر کا انتخاب کرتا ہے اور اسی کے پاس آیت اللہ علی خامنہ ای کے جانشین کے تقرر کا اختیار بھی ہوتا ہے۔

رپورٹس کے مطابق یہ حملہ اُس وقت ہوا جب کونسل سپریم لیڈر کے جانشین کے انتخاب کے لیے اجلاس اور ووٹنگ کے عمل میں مصروف تھی، تاہم یہ واضح نہیں کہ تمام اراکین اس وقت عمارت میں موجود تھے یا نہیں۔

اطلاعات میں کہا گیا ہے کہ 88 کونسل اراکین موجود تھے، لیکن حملے میں کتنے افراد ہلاک اور کتنے زخمی ہوئے، اس حوالے سے تاحال کوئی مصدقہ تفصیل سامنے نہیں آئی ہے۔

ایرانی حکام کی جانب سے واقعے کی مکمل تفصیلات جاری نہیں کی گئیں۔