اسرائیلی حملوں میں حماس کی جنرل سکیورٹی سروس کے سینیئر ارکان ہلاک

یروشلم (ڈیلی اردو رپورٹ) اسرائیلی فوج اور داخلی سلامتی کے ادارے شن بیٹ نے کہا ہے کہ غزہ میں رات گئے کیے گئے حملوں میں حماس کی جنرل سکیورٹی سروس کے کئی سینیئر ارکان ہلاک ہوئے ہیں۔

مشترکہ بیان کے مطابق ہلاک ہونے والوں میں حماس کے جنرل سکیورٹی آپریٹس کے نائب سربراہ حسن رباح حسن لباد بھی شامل ہیں، جبکہ اس یونٹ کے تین دیگر اہلکاروں کے ہلاک ہونے کا بھی کہا گیا ہے۔

حماس کی جانب سے تاحال اس حوالے سے کوئی ردعمل سامنے نہیں آیا ہے۔

اسرائیلی حکام کے مطابق جنرل سکیورٹی سروس حماس کے اندر ایک خفیہ یونٹ تصور کی جاتی ہے، جس کے ذمے قیادت کی حفاظت، رابطہ کاری، معلومات اکٹھی کرنا اور انٹیلیجنس معاونت جیسے امور شامل ہیں۔