اسرائیلی فوج کا جنوبی شام میں آپریشن، متعدد ’مسلح شدت پسند‘ ہلاک

یروشلم (ڈیلی اردو) اسرائیلی فوج نے جنوبی شام میں قائم اپنے سکیورٹی زون میں ایک کارروائی کے دوران متعدد افراد کو ہلاک کرنے کا اعلان کیا ہے۔

برطانیہ میں قائم شامی آبزرویٹری برائے انسانی حقوق کے مطابق اس کارروائی کی تصدیق ہوئی ہے، اور کہا گیا ہے کہ اسرائیلی فوج دو افراد کی لاشیں بھی اپنے ساتھ لے گئی ہے۔

شامی ذرائع کے مطابق یہ کارروائی جنوبی شام کے صوبے قنیطرہ کے گاؤں ہدار میں کی گئی۔

یہ علاقہ شام کے مقبوضہ گولان کی پہاڑیوں کے بفر زون سے باہر واقع ہے، تاہم بشار الاسد کی حکومت کے خاتمے کے بعد اسرائیل نے اس علاقے پر کنٹرول حاصل کر لیا تھا۔

اسرائیل کا کہنا ہے کہ وہ اس علاقے میں اس وقت تک موجود رہے گا جب تک اسرائیلی شہریوں اور فوجیوں کے لیے کسی بھی ممکنہ خطرے کا خاتمہ نہیں ہو جاتا۔