افغان سرحدی صوبوں میں پاکستانی بمباری سے اموات، اقوامِ متحدہ کا اظہارِ تشویش

کابل + پشاور (ڈیلی اردو/وی او اے) اقوام متحدہ نے افغانستان کے صوبے خوست اور کنڑ میں ہونے والے فضائی حملوں پر گہری تشویش کا اظہار کیا ہے۔

اقوامِ متحدہ کے افغانستان کے لیے معاون مشن (یوناما) نے اپنی ایک سوشل میڈیا پوسٹ میں واضح کیا ہے کہ ان حملوں میں بچے اور خواتین بھی نشانہ بنے ہیں۔ بیان میں اس بات پر زور دیا کہ تنازعات میں عام شہریوں کو کبھی بھی ہدف نہیں بنانا چاہیے۔

اقوامِ متحدہ کے مطابق زمینی حقائق اور نقصانات کے حوالے سے جائزہ لیا جا رہا ہے۔

UNAMA is deeply concerned by reports of civilian casualties, incl. women and children, as a result of airstrikes in #Khost & #Kunar provinces last night. Civilians are never a target. UNAMA is working to establish facts on the ground and verify the extent of losses. #Afghanistan pic.twitter.com/lku9rUSl58

— UNAMA News (@UNAMAnews) April 16, 2022

دوسری جانب طالبان حکام نے افغان سر زمین پر پاکستان کی جانب سے ہونے والی بم باری کی شدید الفاظ میں مذمت کی ہے۔ طالبان کے ترجمان ذبیح اللہ مجاہد نے اس اقدام کو ظالمانہ اور افغان دشمنی قرار دیا ہے۔

ذرائع ابلاغ کے نمائندوں کو جاری کردہ آڈیو پیغام میں ذبیح اللہ مجاہد نے بتایا کہ افغانستان کی خود مختاری اور اس طرز کے حملوں کو روکنے کے لیے تمام آپشنز پر کام کر رہے ہیں۔

طالبان ترجمان نے اپنے پیغام میں پاکستان پر واضح کیا کہ اگر جنگ شروع ہوتی ہے تو یہ کسی بھی فریق کے مفاد میں نہیں ہو گی بلکہ یہ پورے خطے میں عدم و استحکام کا باعث بنے گی۔

1/2- The Islamic Emirate of Afghanistan strongly condemns Pakistan's attacks on refugees in Khost and Kunar.

IEA calls on the Pakistani side not to test the patience of Afghans on such issues and not repeat the same mistake again otherwise it will have bad consequences.

— Zabihullah (..ذبـــــیح الله م ) (@Zabehulah_M33) April 16, 2022

یاد رہے کہ طالبان ترجمان کی جانب سے یہ بیان ایک ایسے وقت میں سامنے آیا ہے جب ہفتے کی صبح افغانستان کے صوبہ خوست اور کنڑ میں مبینہ طور پر پاکستان کے جنگی طیاروں کی بمباری کے نتیجے میں کم از کم 30 افراد ہلاک جب کہ متعدد زخمی ہوئے۔

پاکستان کی فوج کی جانب سے اس حوالے سے تاحال کوئی جواب سامنے نہیں آیا ہے تاہم اتوار کے روز پاکستان کے دفترِ خارجہ کی جانب سے جاری ہونے والے ایک بیان میں کہا گیا کہ کچھ عرصے سے افغانستان سے پاکستان کے سیکیورٹی فورسز پر ہونے والے حملوں میں اضافہ ہوا ہے۔

دفترِ خارجہ کے مطابق حالیہ چند ماہ کے دوران پاکستان نے متعدد بار افغانستان سے بارڈر محفوظ بنانے کی درخواست کی کیوں کہ دہشت گرد افغان سرزمین کا استعمال کرتے ہوئے پاکستان کی افواج کو مسلسل نشانہ بنا رہے ہیں۔

پاکستان کے دفتر خارجہ کے بیان میں افغانستان کی جانب سے لگائے جانے والے جنگی طیاروں کی بمباری کے الزامات کے حوالے سے ذکر نہیں ہے۔

دفترِ خارجہ کا مزید کہنا تھا کہ گزشتہ چند ماہ میں پاکستان اور افغانستان مختلف اداروں کے ذریعے اپنی مشترکہ سرحد پر مؤثر تعاون اور سیکیورٹی کے لیے بات چیت کر رہے ہیں۔ بدقسمتی سے سرحدی علاقوں میں کالعدم تنظیم تحریک طالبان پاکستان (ٹی ٹی پی) تسلسل کے ساتھ پاکستان کی چوکیوں پر حملے کر رہی ہے جس کے نتیجے میں کئی پاکستانی اہلکار ہلاک ہوئے ہیں۔

حالیہ دنوں میں افغانستان سے متصل پاکستان کے قبائلی اضلاع میں سیکیورٹی فورسز پر مختلف حملوں میں نو سیکیورٹی اہل کار ہلاک جب کہ متعدد زخمی ہوئے ہیں۔

پاکستان کی جانب سے متعدد بار افغان طالبان کو ٹی ٹی پی کے بڑھتے ہوئے حملوں اور سرحد پار کارروائیوں کی روک تھام کے بارے میں کہا گیا تاہم حکام کا مؤقف ہے کہ اس بابت پاکستان کی درخواست کی کوئی شنوائی نہیں ہوئی۔

اس دوران ٹی ٹی پی سے تعلق رکھنے والے بعض سینئر جنگجو بشمول سابق ترجمان خالد بلتی کی ہلاکتیں بھی سامنے آئیں۔

اسی طرح دسمبر میں راکٹ حملے کا الزام بھی پاکستان پر عائد کیا گیا تھا۔ جس میں ٹی ٹی پی کے سینئر کمانڈر مولوی فقیر محمد کے ٹھکانے کو صوبہ کنڑ میں نشانہ بنایا گیا تھا تاہم وہ اس وقت وہاں موجود نہیں تھے۔

صوبہ کنڑ اور خوست پر بمباری کے واقعات پر بات کرتے ہوئے افغان امور کے ماہر اور شدت پسندی کے موضوع پر تحقیق کرنے والے سوئیڈن میں مقیم محقق عبدالسید کا کہنا ہے کہ پاکستان کی یہ کارروائی ٹی ٹی پی کی جانب سے بڑھتے ہوئے حملوں کا ردِ عمل ہو سکتی ہے۔

وائس آف امریکہ سے بات کرتے ہوئے انہوں نے مزید بتایا کہ اگرچہ پاکستانی فورسز کی جانب سے سرحد پار شیلنگ کا سلسلہ افغانستان میں طالبان کے اقتدار کے بعد بھی جاری ہے مگر یہ پہلی مرتبہ ہے کہ پاکستانی جیٹ طیاروں نے افغان حدود کے اندر گھس کر اتنی بڑی سطح پر کوئی کارروائی کی ہے۔

عبدالسید کے مطابق اس سے یقیناً طالبان حکومت پر افغان عوام اور ان کے حامیوں کی جانب سے ردِ عمل کے لیے شدید دباؤ آئے گا جو کہ یقیناََ طالبان حکومت کے لیے مزید مشکلات کا مؤجب ہوسکتا ہے۔

دوسری جانب پاکستان کی قومی اسمبلی کے اجلاس سے خطاب کرتے ہوئے شمالی وزیرستان سے رکن پارلیمنٹ اور پشتون تحفظ موومنٹ کے رہنما محسن داوڑ نے پاکستان کی ایئر فورس کی بمباری کو شدید تنقید کا نشانہ بناتے ہوئے اس کارروائی کی تحقیقات کا مطالبہ کیا ہے۔

خطاب میں محسن داوڑ کا کہنا تھا کہ اس حملے میں 40 سے زائد افراد ہلاک ہوئے۔ ایسے حملوں کو روکنا ہو گا۔

Mohsin Dawar, member of Pakistan’s National Assembly condemned #Pakistan Air Force strikes in #Khost & #Kunar, & called for an investigation.He also said action must be taken against “whoever ordered this operation”.#ArianaNews #Pakistan #Airstrike #Khost #Kunar #IEA #Civilians pic.twitter.com/HvC3x7TAVp

— Ariana News (@ArianaNews_) April 17, 2022

انہوں نے واضح کیا کہ جنگی طیاروں کی بمباری کے باعث پہلے ہی شہر کے شہر ملیا میٹ ہو چکے ہیں اور ان کا مداوا ابھی تک نہیں ہوا اور ایسے میں نئے محاذ کھولنے سے گریز کرنا چاہیے۔

ماہرین کے مطابق عوام میں خوست اور کنڑ پر کیے جانے والے حملوں کے حوالے سے شدید غصہ پایا جاتا ہے۔

اس حوالے سے ہفتے کے روز پاکستانی طیاروں کی بمباری کے خلاف سینکڑوں افراد نے صوبہ خوست میں مظاہرہ کیا جس میں پاکستان مخالف نعرے بازی کی گئی۔

وائس آف امریکہ سے بات کرتے ہوئے صوبۂ خوست کے مقامی صحافی عصمت اللہ حلیم نے بتایا کہ مظاہرے میں شریک افراد کا کہنا تھا کہ افغان حکومت کو چاہیے کہ پاکستان کے ساتھ اس مسئلے کو سفارتی طریقے سے اٹھائے اور اگر پاکستان کی جانب سے کوئی مؤثر جواب سامنے نہیں آتا تو پھر جوابی کارروائی کی جائے۔

انہوں نے مزید بتایا کہ علاقے کے عوام اور عمائدین کا کہنا تھا کہ اگر اس حوالے سے حکومت کچھ نہیں کرتی تو پھر وہ خود ہی پاکستانی سیکیورٹی فورسز کے ساتھ نمٹنے کے لیے تیار ہیں۔