افغان طالبان اور ٹی ٹی پی کے گٹھ جوڑ کے ٹھوس ثبوت ہیں، پاکستانی وزیراعظم

اسلام آباد (ڈیلی اردو) پاکستان کے وزیراعظم شہباز شریف نے کہا ہے کہ افغان طالبان اور تحریکِ طالبان پاکستان (ٹی ٹی پی) کے درمیان گٹھ جوڑ کے ٹھوس ثبوت موجود ہیں۔ 

انہوں نے یہ بات قومی پیغامِ امن کمیٹی کے ارکان سے گفتگو کے دوران کہی اور کہا کہ دہشت گردی کا ناسور دوبارہ سر اٹھا رہا ہے، مگر حکومت 2018 کی طرح دہشت گردی کا مکمل خاتمہ کر دے گی۔

وزیراعظم نے مزید کہا کہ دشمن کی طرف سے دہشت گردوں کو ہر طرح کے وسائل فراہم کیے جا رہے ہیں، اور پاکستان کی سرحدوں سے دہشت گردوں کو اٹھا کر بحرِ ہند میں ڈبو دیا جائے گا۔

شہباز شریف نے کہا کہ تمام مکتبہ فکر کے جید علماء کا یہاں موجود ہونا خوش آئند ہے اور قومی یکجہتی کی اس وقت پہلے سے کہیں زیادہ ضرورت ہے۔ انہوں نے اس بات پر زور دیا کہ ملک کے اہم مسائل پر مل بیٹھ کر مشترکہ فیصلے کیے جائیں۔