افغان طالبان کا پاکستان میں داعش کے مراکز پر ڈرون حملوں کا دعویٰ

کابل/اسلام آباد (ڈیلی اردو)  افغان طالبان کی وزارتِ دفاع کے نائب ترجمان صدیق اللہ نصرت نے کہا ہے کہ افغان فضائیہ نے پاکستان کے صوبہ بلوچستان کے ضلع پشین کے سرانان علاقے اور خیبر پختونخوا کے مختلف مقامات پر داعش کے مبینہ مراکز کو نشانہ بنایا ہے۔

ان کے مطابق سرانان میں ایک مشترکہ مرکز، خیبر پختونخوا کے ضلع خیبر کے علاقے قمبرخیل میں داعش کے مبینہ مرکز اور چترال کی شاہ سلیم وادی کے گرم چشمہ علاقے میں ایک اور مبینہ مرکز پر فضائی کارروائیاں کی گئیں۔ 

طالبان کا کہنا ہے کہ ان کارروائیوں میں داعش کے جنگجوؤں، ان کے حامیوں اور دیگر مسلح عناصر کو بھاری جانی و مالی نقصان پہنچا، جبکہ شہریوں کو کوئی نقصان نہیں پہنچا۔

دوسری جانب بلوچستان کے ضلع پشین کے علاقے سرانان میں ڈرون گرنے کے نتیجے میں کم از کم دو افراد زخمی ہوگئے۔ مقامی حکام کے مطابق افغانستان کی جانب سے آنے والے ایک یا دو ڈرونز کو فائرنگ کرکے مار گرایا گیا، جن کے ملبے سے یہ جانی نقصان ہوا۔

ادھر پشاور کے مضافاتی علاقے حسن خیل میں بھی مبینہ طور پر ایک ڈرون گرنے یا تباہ کیے جانے کے نتیجے میں دو بچوں سمیت ایک ہی خاندان کے پانچ افراد زخمی ہوگئے۔ پشاور پولیس نے ڈرون کا ملبہ ملنے کی تصدیق کرتے ہوئے کہا ہے کہ واقعے کی مزید تحقیقات جاری ہیں۔

سکیورٹی ذرائع کے مطابق پاکستان فورسز نے پشاور کے پوش علاقے حیات آباد میں بھی افغان ڈرونز مار گرائے ہیں۔

پاکستانی فوج کے شعبہ تعلقات عامہ (آئی ایس پی آر) کے مطابق افغان طالبان حکومت کی جانب سے بلوچستان میں سرحد پار ڈرون پروازیں ہوئیں جس پر پاکستان نے مؤثر جوابی کارروائی کرتے ہوئے  ڈرون مار گرائے۔

یہ پیش رفت ایسے وقت میں سامنے آئی ہے جب پاکستان نے حال ہی میں افغانستان کے صوبوں پکتیکا، پکتیا اور کنڑ میں فضائی کارروائیاں کرتے ہوئے تحریک طالبان پاکستان اور جماعت الاحرار کے مبینہ ٹھکانوں کو نشانہ بنانے کا اعلان کیا تھا، جبکہ افغان طالبان نے ان حملوں میں عام شہریوں کی ہلاکت کا الزام عائد کیا تھا۔