افغانستان: جلال آباد میں چیک پوائنٹ پر حملہ، 3 طالبان سمیت 5 افراد ہلاک

کابل (ڈیلی اردو) مشرقی افغانستان میں نامعلوم مسلح ملزمان کی جانب سے چیک پوائنٹ پر حملے کے نتیجے میں 3 طالبان سمیت پانچ افراد ہلاک ہوگئے۔

تفصیلات کے مطابق جلال آباد کے صوبائی دارالحکومت کے ایک پٹرول پمپ پر فائرنگ کے ایک واقعے میں طالبان کی گاڑی کو نشانہ بنایا گیا۔ اس حملے میں دو افراد اور ایک بچے کی ہلاکت کا بتایا گیا ہے۔ جلال آباد میں ہی ایک اور بم دھماکے میں ایک بچہ ہلاک اور دو طالبان جنجگو زخمی ہوئے۔ طالبان کے خلاف ہونے والے ان تازہ حملوں کی ابھی تک کسی گروہ نے ذمہ داری قبول نہیں کی ہے۔

فرانسیسی خبر رساں ادارے ‘اے ایف پی’ کے مطابق طالبان عہدیدار نے حملے میں ہلاکتوں کی تصدیق کرتے ہوئے کہا کہ تمام مقتولین عام شہری تھے۔

تاہم عینی شاہدین اور سیکیورٹی ذرائع نے بتایا کہ ہلاک ہونے والوں میں تین طالبان جنگجو بھی شامل ہیں۔

انہوں نے کہا کہ رکشے میں سوار نامعلوم مسلح افراد نے جلال آباد کے ضلع گھاؤچک میں چیک پوائنٹ پر حملہ کیا۔

یہ صوبہ ننگرہار میں طالبان کے اہداف پر تازہ حملہ ہے جو چار سالوں تک عالمی شدت پسند تنظیم ‘داعش’ کے افغانستان چیپٹر کا مرکزی ٹھکانہ رہا ہے۔

ایک اور واقعے میں جلال آباد میں دو طالبان جنگجو ریموٹ کنٹرول ڈیوائس کو ناکارہ بنانے کی کوشش کرتے ہوئے زخمی ہوئے۔

واقعے کے حوالے سے ابتدائی طور پر مزید معلومات سامنے نہیں آسکیں۔

داعش کی مقامی شاخ داعش خراسان نے جلال آباد میں کئی حملوں کی ذمہ داری قبول کی تھی جس میں کم از کم 4 طالبان ہلاک ہوئے۔ داعش خراسان نے اگست کے آخر میں کابل ایئرپورٹ پر خوفناک حملے کی ذمہ داری بھی قبول کی تھی، جس میں 200 سے زائد افراد ہلاک ہوئے تھے۔