افغانستان:طالبان نے مختلف جرائم پر 11 افراد کو سرِعام کوڑے مارے

کابل (ڈیلی اردو) افغان طالبان کی جانب سے منشیات اور شراب کی اسمگلنگ کے جرم میں سزا کے طور پر 11 افراد کو سرِعام کوڑے مارے گئے۔

افغان میڈیا کے مطابق طالبان کے زیرِ انتظام سپریم کورٹ نے پیر کے روز ان سزاؤں کی تصدیق کی۔ عدالت کی جانب سے جاری بیان میں کہا گیا ہے کہ ان افراد کو نشہ آور گولیوں، میتھامفیتامین، شراب اور چرس کی اسمگلنگ اور فروخت کے الزامات پر مجرم قرار دیا گیا۔

بیان کے مطابق ہر مجرم کو 10 سے 30 کوڑوں کی سزا سنائی گئی، جبکہ انہیں 7 ماہ سے 3 سال تک قید کی سزا بھی دی گئی ہے۔

افغان میڈیا کا کہنا ہے کہ طالبان سپریم کورٹ کے بیانات سے مرتب کردہ اعداد و شمار کے مطابق گزشتہ تین ماہ کے دوران افغانستان میں جسمانی سزاؤں میں نمایاں اضافہ دیکھنے میں آیا ہے۔ ان اعداد و شمار کے مطابق اس عرصے میں کم از کم 346 افراد کو کوڑے مارے جا چکے ہیں۔

دوسری جانب اقوام متحدہ اور دیگر بین الاقوامی تنظیمیں بارہا طالبان سے جسمانی سزاؤں کا سلسلہ ختم کرنے کا مطالبہ کر چکی ہیں۔ عالمی اداروں نے خبردار کیا ہے کہ اس نوعیت کی سزائیں بین الاقوامی انسانی حقوق کی سنگین خلاف ورزی کے زمرے میں آتی ہیں۔