افواج پاکستان دہشت گردی کے خاتمے کیلئے ”فیصلہ کن جنگ“ لڑ رہی ہیں، فیلڈ مارشل

راولپنڈی (ڈیلی اردو) فیلڈ مارشل سید عاصم منیر نے کہا ہے کہ پاکستان کی مسلح افواج دہشت گردی کے مکمل خاتمے کے لیے ”پُرعزم اور فیصلہ کن“ جنگ لڑ رہی ہیں، اور ملک کے خلاف منفی پروپیگنڈا کرنے والی قوتیں اپنے مقاصد میں ناکام ہوں گی۔

پاکستان فوج کے ترجمان ادارے ’آئی ایس پی آر‘ کے مطابق کوئٹہ کے دورے میں صوبہ بلوچستان میں تعینات افسران اور جوانوں سے ملاقات کے دوران انہوں نے سیکیورٹی صورتحال پر تفصیلی بریفنگ لی اور کہا کہ دہشت گردی کے ہر نیٹ ورک کو ختم کیا جائے گا۔

انہوں نے کہا کہ پاکستان کی ترقی کو جھوٹی خبروں، پراپیگنڈے اور بیرونی حمایت یافتہ سرگرمیوں کے ذریعے سبوتاژ نہیں کیا جا سکتا، اور ریاستی استحکام کو چیلنج کرنے والے عناصر کو سخت جواب دیا جائے گا۔

کمانڈ اینڈ اسٹاف کالج کوئٹہ میں خطاب کرتے ہوئے فیلڈ مارشل نے کہا کہ جدید جنگی ماحول میں ابھرتی ٹیکنالوجی، کثیر الجہتی آپریشنز اور تینوں مسلح افواج کی مشترکہ حکمت عملی ناگزیر ہو چکی ہے۔

انہوں نے افسران کو مسلسل تربیت اور تیاری پر زور دیتے ہوئے کہا کہ بدلتے جنگی تقاضوں کا مقابلہ صرف پیشہ ورانہ مہارت اور جدید سوچ سے ہی ممکن ہے۔

بلوچستان کے حوالے سے انہوں نے کہا کہ پائیدار امن کے لیے بہتر گورننس اور عوامی فلاح کو سیکیورٹی اقدامات کے ساتھ ساتھ آگے بڑھانا ہوگا۔

فیلڈ مارشل نے بلوچستان میں تعینات اہلکاروں کے مورال اور کارکردگی کو بھی سراہا۔