امریکا اور ایران میں مذاکرات کی بحالی کیلئے سفارتی کوششیں تیز، قطر

دوحہ (ڈیلی اردو)قطر نے کہا ہے کہ امریکا اور ایران کے درمیان مذاکرات دوبارہ شروع کرانے کے لیے گزشتہ تقریباً دو ہفتوں سے سفارتی رابطوں کا سلسلہ جاری ہے، جبکہ پاکستان بھی دونوں ممالک کے درمیان کشیدگی کم کرنے اور بات چیت کی راہ ہموار کرنے کی کوششوں میں شریک ہے۔

قطری وزارت خارجہ کے ترجمان ماجد الانصاری نے بتایا کہ دوحہ کی ثالثی ٹیم ایرانی اور امریکی حکام سے مسلسل رابطے میں ہے۔ ان کے مطابق مذاکرات کی بحالی کے امکانات پر مختلف تجاویز زیر غور ہیں اور فریقین کے درمیان موجود اختلافات کم کرنے کی کوشش کی جا رہی ہے۔

ماجد الانصاری نے کہا کہ ثالثی کے عمل سے وابستہ حکام مختلف دارالحکومتوں کا دورہ بھی کر رہے ہیں تاکہ دونوں ممالک کے مؤقف میں موجود فاصلے کو کم کرنے اور دوبارہ مذاکرات شروع کرنے کے لیے ممکنہ راستوں کا جائزہ لیا جاسکے۔

قطری ترجمان کے مطابق دوحہ کو امریکی حکام کی جانب سے یہ یقین دہانی بھی کرائی گئی ہے کہ واشنگٹن ایران کے ساتھ کسی معاہدے تک پہنچنے میں دلچسپی رکھتا ہے۔

دوسری جانب پاکستان بھی امریکا اور ایران کے درمیان رابطوں اور کشیدگی میں کمی کے لیے سفارتی کوششیں جاری رکھے ہوئے ہے۔ تاہم مذاکرات کی باقاعدہ بحالی اور کسی ممکنہ معاہدے کی پیش رفت کا انحصار دونوں فریقوں کے درمیان اتفاق رائے پر ہوگا۔