امریکا نے ایران پر نئی پابندیاں عائد کر دیں

واشنگٹن (ڈیلی اردو) امریکا نے ایران کے جوہری معاہدے سے متعلق متوقع مذاکرات سے قبل تہران کے خلاف نئی پابندیاں عائد کر دی ہیں۔

غیر ملکی خبررساں ایجنسی کے مطابق امریکی محکمہ خزانہ کی جانب سے عائد تازہ پابندیوں میں 30 سے زائد افراد، اداروں اور بحری جہازوں کو نشانہ بنایا گیا ہے، جن پر الزام ہے کہ وہ ایرانی پیٹرولیم کی مبینہ غیر قانونی فروخت اور اسلحہ سازی میں معاونت کر رہے تھے۔

بیان کے مطابق اُن بحری جہازوں کو خاص طور پر نشانہ بنایا گیا ہے جو ایران کے مبینہ ’شیڈو فلیٹ‘ کا حصہ سمجھے جاتے ہیں اور ایرانی تیل و پیٹرولیم مصنوعات کو بیرونی منڈیوں تک پہنچاتے ہیں۔ 

امریکی حکام کا کہنا ہے کہ اس اقدام کا مقصد ایرانی حکومت کے مالی وسائل کو محدود کرنا ہے۔

امریکی وزیر خزانہ اسکاٹ بیسنٹ نے کہا کہ ایران مالیاتی نظام کو مبینہ طور پر غیر قانونی تیل فروخت کرنے، آمدنی چھپانے، اپنے جوہری اور روایتی ہتھیاروں کے پروگرام کے لیے پرزہ جات حاصل کرنے اور شدت پسند گروہوں کی حمایت کے لیے استعمال کرتا ہے۔

انہوں نے کہا کہ ڈونلڈ ٹرمپ کی انتظامیہ ایران پر ’زیادہ سے زیادہ دباؤ‘ برقرار رکھے گی تاکہ اس کی ہتھیاروں کی صلاحیت اور شدت پسند تنظیموں کی مبینہ حمایت کو نشانہ بنایا جا سکے۔

صدر ٹرمپ اس سے قبل بھی کہہ چکے ہیں کہ اگر ایران نے اپنے جوہری پروگرام کے حوالے سے معاہدہ نہ کیا تو اس کے خلاف فوجی کارروائی کی جا سکتی ہے۔ انہوں نے حالیہ اسٹیٹ آف دی یونین خطاب میں ایران پر ’خطرناک جوہری عزائم‘ رکھنے کا الزام بھی عائد کیا۔

دوسری جانب ایرانی صدر مسعود پزشکیان نے امریکا کے ساتھ ممکنہ مذاکرات کے حوالے سے محتاط امید کا اظہار کیا ہے۔