امریکا: کیلیفورنیا کے اسلامک سینٹر میں فائرنگ، 2 حملہ آوروں سمیت 5 افراد ہلاک

واشنگٹن (ڈیلی اردو) امریکی ریاست کیلیفورنیا کے شہر سین ڈیاگو میں واقع ایک اسلامک سینٹر میں فائرنگ کے واقعے میں 2 حملہ آوروں سمیت 5 افراد ہلاک جبکہ متعدد افراد زخمی ہو گئے۔ پولیس نے واقعے کی تحقیقات شروع کر دی ہیں اور اسے ممکنہ طور پر نفرت پر مبنی جرم قرار دینے پر غور کیا جا رہا ہے۔

امریکی میڈیا کے مطابق واقعہ اس وقت پیش آیا جب مسلح افراد نے سین ڈیاگو کے سب سے بڑے اسلامک سینٹر میں داخل ہو کر اچانک فائرنگ شروع کر دی۔ فائرنگ کے دوران سینٹر کے سکیورٹی محافظ نے حملہ آوروں کو روکنے کی کوشش کی تاہم وہ گولیاں لگنے سے ہلاک ہو گیا۔

پولیس کے مطابق حملہ آوروں کی فائرنگ سے مزید 3 افراد بھی ہلاک ہوئے، جس کے بعد مجموعی طور پر 5 افراد جان کی بازی ہار گئے جن میں دونوں مشتبہ حملہ آور بھی شامل ہیں۔ 

حکام نے بتایا کہ جوابی کارروائی میں پولیس نے فائرنگ کرنے والے دونوں حملہ آوروں کو موقع پر ہی ہلاک کر دیا۔

ابتدائی معلومات کے مطابق دونوں حملہ آور کم عمر تھے اور ان کے محرکات کے بارے میں تحقیقات جاری ہیں۔ پولیس نے اس واقعے کو نفرت پر مبنی جرم قرار دینے کے امکان کو بھی رد نہیں کیا۔

اسلامک سینٹر انتظامیہ نے تصدیق کی ہے کہ فائرنگ کے دوران ایک سکیورٹی محافظ ہلاک ہوا تاہم اس کی شناخت تاحال ظاہر نہیں کی گئی۔ 

انتظامیہ کے مطابق حملے کے وقت بڑی تعداد میں افراد مرکز میں موجود تھے تاہم بروقت کارروائی اور حفاظتی اقدامات کے باعث مزید جانی نقصان سے بچاؤ ممکن ہوا۔

امریکی حکام کے مطابق اسلامک سینٹر شہر کا سب سے بڑا مذہبی مرکز ہے جہاں باقاعدہ طور پر نمازیں، مذہبی اجتماعات، سیمینارز اور تعلیمی سرگرمیاں منعقد کی جاتی ہیں، جبکہ اس کے احاطے میں ایک اسکول بھی قائم ہے۔

پولیس نے علاقے کو گھیرے میں لے کر شواہد اکٹھے کرنا شروع کر دیے ہیں اور واقعے کی ہر پہلو سے تحقیقات جاری ہیں۔