امریکہ نے 120 ایرانی شہری ملک بدر کر دیے

واشنگٹن (ڈیلی اردو ) ایران کی طرف سے منگل 30 ستمبر کے روز کہا گیا کہ امریکہ کے ساتھ طے پانے والی ایک ڈیل کے تحت امریکہ 120 ایرانی شہریوں کو ملک بدر کر کے واپس ایران بھیج دے گا، اور یہ ایرانی باشندے اسی ہفتے واپس وطن پہنچ جائیں گے۔

تہران سے موصولہ رپورٹوں کے مطابق ایرانی وزارت خارجہ کے قونصلر امور کے ایک اعلیٰ عہدیدار نے ایرانی نیوز ایجنسی تسنیم کو بتایا کہ امریکی صدر ڈونلڈ ٹرمپ کی انتظامیہ کی طرف سے امریکہ میں مقیم غیر قانونی تارکین وطن کے خلاف کریک ڈاؤن کی مہم کے دوران ’’120 ایرانی باشندے ملک بدر کیے جا رہے ہیں اور وہ آئندہ چند دنوں میں واپس ایران پہنچ جائیں گے۔‘‘

اس ایرانی اہلکار نے مزید کہا، ’’امریکی امیگریشن حکام نے تقریباﹰ 400 ایسے ایرانی باشندوں کو ملک بدر کرنے کا فیصلہ کیا ہے، جن کی اکثریت امریکہ میں غیر قانونی طور پر داخل ہوئی تھی۔‘‘

اسی دوران امریکی اخبار نیو یارک ٹائمر نے لکھا ہے کہ ان ایرانی شہریوں کو لے کر ایک خصوصی امریکی پرواز کل پیر کے روز لوئیزیانا سے روانہ ہو گئی تھی اور اس پرواز میں  سوار ایرانی تارکین وطن خیلجی ریاست قطر کے راستے ممکنہ طور پر آج منگل 30 ستمبر کو کسی وقت تہران پہنچ جائیں گے۔

نیو یارک ٹائمز کے مطابق ان ایرانی باشندوں کی امریکہ سے ملک بدری اور ایران واپسی کا معاہدہ تہران اور واشنگٹن کے مابین کئی مہینوں تک جاری رہنے والی بات چیت کا نتیجہ ہے اور یہ دونوں ممالک کے مابین اس تعاون کا نتیجہ بھی یے، جو کسی بھی شعبے میں شاذ و نادر ہی نظر آتا ہے۔