امریکہ پناہ گزینوں کو قانونی تحفظ دے، اقوام متحدہ کی اپیل

نیو یارک (ڈیلی اردو) اقوام متحدہ کی ایجنسیوں نے جمعہ کو امریکا سے اپیل کی کہ وہ پناہ گزینوں کو ملک میں داخلے اور قانونی کارروائی کا حق فراہم کرے۔ یہ اپیل ایک ایسے وقت میں کی گئی ہے، جب امریکی صدر ڈونلڈ ٹرمپ نے وائٹ ہاؤس کے نزدیک ہوئے ایک حملے کے بعد ’’تھرڈ ورلڈ کنڑیز‘‘ کے ممالک سے ہجرت منجمد کرنے کا اعلان کیا ہے۔

تحقیقات کے مطابق امریکی دارالحکومت واشنگٹن میں مشتبہ طور پر ایک افغان شہری نے حملہ کیا، جو سن 2021 میں امریکہ آیا تھا۔ اقوام متحدہ کے انسانی حقوق دفتر کے ترجمان جیریمی لارنس نے جنیوا میں بریفنگ کے دوران کہا، ’’انہیں (پناہ کے متلاشی افراد کو) بین الاقوامی قانون کے تحت تحفظ کا حق حاصل ہے اور انہیں قانونی کارروائی کا موقع دیا جانا چاہیے۔‘‘

اقوام متحدہ کے پناہ گزینوں کے ادارے کی ترجمان ایوجن بیون نے بھی امریکی صدر سے کہا کہ انہیں اپنے اس فیصلے پر نظر ثانی کرنا چاہیے، ’’جب ایسے لوگ کسی ملک میں پہنچتے ہیں جنہیں تحفظ کی ضرورت ہے، تو انہیں پناہ کے قانونی عمل سے گزرنے کا حق ہونا چاہیے اور انہیں ملک میں داخلے کی اجازت ملنی چاہیے۔‘‘

امریکی صدر ٹرمپ نے کہا ہے کہ ان کی انتظامیہ امریکہ میں مہاجرت کے نظام کو ازسر نو ترتیب دینے کے لیے ’تیسری دنیا کے تمام ممالک‘ سے ہجرت مستقل طور پر روکنے اور رہائش و شہریت سے متعلق اقدامات کا جائزہ لینے پر کام کر رہی ہے۔ یہ اقدام ان کی جانب سے حالیہ مہینوں میں سخت امیگریشن پالیسیوں کے تسلسل کا حصہ ہے۔