امریکی حملے کے جواب میں فضائی اڈہ تباہ کر دیا، پاسدارانِ انقلاب کا دعویٰ

تہران/واشنگٹن (ڈیلی اردو) پاسدارانِ انقلاب نے دعویٰ کیا ہے کہ اُن کی ایرو سپیس فورس نے اس فضائی اڈے کو نشانہ بنایا ہے جہاں سے مبینہ طور پر سیریک جزیرے کے ایک ٹیلی کمیونیکیشن ٹاور پر امریکہ کی جانب سے حملہ کیا گیا تھا۔

پاسدارانِ انقلاب کی جانب سے جاری بیان میں اس فضائی اڈے کے مقام کی تفصیلات فراہم نہیں کی گئیں۔

بیان کے مطابق یہ کارروائی ’امریکی فوج کی جانب سے ایک گھنٹہ قبل کی گئی جارحیت‘ کے جواب میں کی گئی۔

پاسدارانِ انقلاب نے کہا کہ اس کی فورسز نے ’اس فضائی اڈے کو نشانہ بنایا جہاں سے جارحیت کا آغاز ہوا تھا‘ اور حملے کے دوران مقررہ اہداف کو کامیابی سے نشانہ بنا کر تباہ کر دیا گیا۔

بیان میں حملے سے ہونے والے ممکنہ جانی اور مالی نقصانات کے بارے میں مزید تفصیلات نہیں دی گئیں، جبکہ امریکی حکام کی جانب سے بھی فوری طور پر اس دعوے پر کوئی ردِعمل سامنے نہیں آیا ہے۔

واضح رہے کہ اس سے قبل امریکی سینٹرل کمانڈ کی جانب سے یہ دعویٰ سامنے آیا تھا کہ امریکی افواج نے ایران کے اندر واقع ریڈار اور ڈرون کمانڈ اینڈ کنٹرول مراکز پر ’دفاعی کارروائی‘ کے تحت حملے کیے ہیں۔

امریکی سینٹرل کمانڈ کے مطابق یہ کارروائیاں سنیچر اور اتوار کے روز ایران کے شہر گوروک اور جزیرہ قشم پر کی گئیں۔

دوسری جانب امریکی فوج نے یہ بھی کہا ہے کہ گزشتہ رات تقریباً 11 بجے کویت میں تعینات امریکی اہلکاروں کو نشانہ بنانے والے ایران کے دو بیلسٹک میزائلوں کو کامیابی سے روک لیا گیا۔

سینٹکام کے مطابق دونوں میزائلوں کو فوری طور پر تباہ کر دیا گیا اور اس واقعے میں کسی امریکی اہلکار کو نقصان نہیں پہنچا۔ امریکی فوج نے کہا کہ خطے میں بڑھتی ہوئی کشیدگی کے باوجود امریکی افواج اپنی تنصیبات، اہلکاروں اور مفادات کے تحفظ کے لیے چوکس ہیں۔

حالیہ فوجی کارروائیوں اور جوابی حملوں کے دعوؤں نے خطے میں جاری جنگ بندی اور استحکام کے حوالے سے نئے خدشات پیدا کر دیے ہیں، جبکہ دونوں ممالک کی جانب سے ایک دوسرے کے خلاف بیانات اور عسکری سرگرمیوں میں اضافہ دیکھا جا رہا ہے۔