امریکی ریاست کیلیفورنیا میں دھماکا،ایک شخص ہلاک، پانچ زخمی

واشنگٹن (ش ح ط) امریکی ریاست کیلیفورنیا کے شہر پام اسپرنگز میں ہفتے کے روز ایک مرکز صحت کے باہر ہونے والے دھماکے میں کم از کم ایک شخص ہلاک اور پانچ زخمی ہو گئے۔ وفاقی تحقیقاتی ادارے (ایف بی آئی) نے واقعے کو “دہشتگردی کا ایک واضح اور منصوبہ بند واقعہ” قرار دیا ہے۔

ایف بی آئی کے لاس اینجلس فیلڈ آفس کے انچارج اسسٹنٹ ڈائریکٹر عقیل ڈیوس نے ہفتے کو پریس کانفرنس میں بتایا کہ ہلاک ہونے والے شخص کی شناخت تاحال جاری ہے، تاہم ابتدائی شواہد سے ظاہر ہوتا ہے کہ یہی شخص ممکنہ طور پر دھماکے کا ذمے دار تھا۔

ڈیوس کے مطابق یہ “جنوبی کیلیفورنیا کی حالیہ تاریخ کی سب سے بڑی بم حملے کی تحقیقات میں سے ایک” ہے۔ ان کا کہنا تھا کہ یہ حملہ دانستہ طور پر زرخیزی کلینک کو نشانہ بناتے ہوئے کیا گیا۔ ایف بی آئی کی جوائنٹ ٹیررازم ٹاسک فورس، پام اسپرنگز پولیس اور بیورو آف الکحل، ٹوبیکو، فائر آرمز اینڈ ایکسپلوسوز (ATF) اس واقعے کی مشترکہ تحقیقات کر رہے ہیں۔

پام اسپرنگز پولیس چیف اینڈی ملز نے واقعے کو “تنہا اور مخصوص” قرار دیتے ہوئے کہا کہ شہر کو فی الحال کوئی مزید خطرہ لاحق نہیں۔ ان کا کہنا تھا، “دہشتگردی نے پام اسپرنگز کے دروازے پر دستک دی، لیکن ہم محفوظ رہے اور یہ شہر ایک بار پھر اٹھے گا۔”

دھماکہ صبح 11 بجے “امریکن ریپروڈکٹیو سینٹرز” کلینک کے باہر ہوا، جو لاس اینجلس سے تقریباً 100 میل دور واقع ایک پرآسائش شہر ہے۔ دھماکے کے بعد کی ویڈیوز میں دھوئیں کے بادل، ٹوٹی کھڑکیاں، اور سائرن کی آوازیں سنائی دے رہی ہیں۔ پولیس کے مطابق متاثرہ علاقہ تقریباً 250 گز پر پھیلا ہوا ہے۔

ایف بی آئی کے مطابق، دھماکے کی تحقیقات کے سلسلے میں قریبی علاقے ٹوئنٹی نائن پامز میں واقع ایک رہائشگاہ کو بھی مشتبہ قرار دیا گیا ہے۔ حکام کا کہنا ہے کہ احتیاطی تدابیر کے تحت اس علاقے میں انخلا ممکن ہے۔

کلینک انتظامیہ کا کہنا ہے کہ ان کا تمام عملہ محفوظ ہے اور ان کی لیبارٹری میں موجود انڈے، ایمبریوز اور دیگر تولیدی مواد کو کوئی نقصان نہیں پہنچا۔

کلینک کی جانب سے جاری بیان میں کہا گیا: “ہماری اولین ترجیح ہمیشہ خاندانوں کو امید دینا رہی ہے۔ اس سانحے کے باوجود ہم اپنے مشن پر قائم رہیں گے، کیونکہ ہم سمجھتے ہیں کہ شفا کا آغاز کمیونٹی، ہمدردی اور دیکھ بھال سے ہوتا ہے۔”

کلینک میں ان وٹرو فرٹیلائزیشن (IVF)، سروگیسی اور انڈے محفوظ کرنے سمیت دیگر خدمات فراہم کی جاتی ہیں۔

واقعے کی حتمی وجوہات تاحال سامنے نہیں آئیں، تاہم بعض حلقے اس حملے کو تولیدی حقوق، خاص طور پر آئی وی ایف سے متعلق حالیہ سیاسی اور عدالتی تنازعات سے جوڑ کر دیکھ رہے ہیں۔ گزشتہ برس ریاست الاباما کی سپریم کورٹ نے منجمد ایمبریوز کو قانونی طور پر “بچہ” قرار دیا تھا، جس کے بعد ریاست میں آئی وی ایف خدمات کچھ عرصے کے لیے بند کر دی گئی تھیں۔

کیلیفورنیا کے گورنر گیون نیوسم نے واقعے پر افسوس کا اظہار کرتے ہوئے کہا ہے کہ ریاستی ادارے وفاقی حکام کے ساتھ مل کر تحقیقات میں مصروف ہیں، اور متاثرہ افراد ان کی دعاؤں میں شامل ہیں۔