امریکی مذاکرات کار ایران امن معاہدے میں جلد بازی نہ کریں، صدر ڈونلڈ ٹرمپ

واشنگٹن (ڈیلی اردو/روئٹرز/اے ایف پی/اے پی/ڈی پی اے) صدر ڈونلڈ ٹرمپ نے اتوار 24 مئی کے روز کہا کہ انہوں نے امریکی مذاکراتی مندوبین سے کہہ دیا ہے کہ وہ ایران کے ساتھ ممکنہ امن ڈیل میں کوئی جلد بازی نہ کریں۔ ڈونلڈ ٹرمپ کے بقول تہران کے ساتھ مکالمت تعمیری طور پر آگے بڑھ رہی ہے۔

واشنگٹن سے ملنے والی رپورٹوں کے مطابق امریکہ کے صدر نے کہا کہ عمومی توقعات یہی ہیں کہ ایران جنگ کے خاتمے کے لیے تہران کے ساتھ ممکنہ جنگ بندی معاہدہ طے پانے کے قریب ہے، تاہم اس معاہدے پر دستخط ہونے تک امریکی مذاکراتی مندوبین ’’کوئی جلد بازی نہیں کریں گے۔‘‘

صدر ٹرمپ نے اپنے سوشل میڈیا پلیٹ فارم ’ٹروتھ سوشل‘ پر اتوار کے روز لکھا، ’’مذاکرات منظم اور تعمیری انداز میں آگے بڑھ رہے ہیں اور میں نے اپنے مذاکراتی نمائندوں پر واضح کر دیا ہے کہ کسی معاہدے تک پہنچنے کے لیے ہماری طرف سے کسی جلد بازی کا مظاہرہ نہیں کیا جانا چاہیے۔‘‘

ڈونلڈ ٹرمپ نے ’ٹروتھ سوشل‘ پر مزید لکھا، ’’جب تک کسی معاہدے تک پہنچا نہیں جاتا، اس کی تصدیق نہیں ہو جاتی اور دستخط نہیں ہو جاتے، تب تک ایرانی بندرگاہوں کی امریکی ناکہ بندی پوری قوت کےساتھ جاری رکھی جائے گی۔‘‘

ڈونلڈ ٹرمپ نے اپنے آج کے اس بیان سے صرف ایک روز قبل کل ہفتہ 23 مئی کے دن کہا تھا کہ ایران کے ساتھ جنگ بندی معاہدے کے لیے ’’مذاکراتی عمل زیادہ تر مکمل کر لیا گیا ہے،‘‘ تاہم آج اتوار کے روز ان کا کہنا تھا کہ کوئی ’’جلد بازی اس لیے نہیں کی جائے گی کہ اس معاملے میں وقت کا پلڑا ہماری طرف جھکا ہوا ہے۔‘‘

صدر ٹرمپ کے الفاظ میں، ’’معاہدے کے لیے دونو‌ن فریقوں کو اپنے لیے درکار پورا وقت استعمال کرنا چاہیے، تاکہ جب کوئی معاہدہ کیا جائے، تو وہ بالکل درست طور پر کیا جائے۔‘‘