اپر اورکزئی میں دو شدت پسند گروپوں میں جھڑپ، لشکر اسلام کے 4 ارکان ہلاک

اورکزئی (ڈیلی اردو)خیبرپختونخواہ کے شورش زدہ قبائلی ضلع اپر اورکزئی کے علاقے میں کالعدم تحریک طالبان پاکستان (ٹی ٹی پی) کے شميم گروپ اور لشکر اسلام کے شاہین گروپ سے وابستہ افراد کے درمیان مبینہ جھڑپ میں لشکر اسلام کے چار ارکان ہلاک ہوگئے۔ ذرائع کے مطابق دونوں گروپوں کے درمیان ایک نوجوان سے متعلق تنازع کے بعد فائرنگ کا واقعہ پیش آیا۔

ذرائع کا کہنا ہے کہ واقعہ اپر اورکزئی کے میر کلام خیل علاقے میں پیش آیا، جہاں ایک نوجوان مبینہ طور پر لشکر اسلام سے وابستہ افراد کے پاس موجود تھا۔ ٹی ٹی پی شميم گروپ کے افراد کی جانب سے اسے اپنے ساتھ لے جانے کی کوشش کے دوران دونوں گروہوں کے درمیان تنازع شدت اختیار کرگیا، جو بعد ازاں مسلح تصادم میں تبدیل ہوگیا۔

فائرنگ کے نتیجے میں لشکر اسلام شاہین گروپ سے تعلق رکھنے والے چار افراد ہلاک ہوگئے۔ ذرائع کے مطابق بعد میں ان کی لاشیں میر کلام خیل کے علاقے ہلکی کڈہ کے قریب سور ڈنڈ گاؤں سے ملیں۔

ذرائع نے دعویٰ کیا کہ جھڑپ کے بعد ٹی ٹی پی شميم گروپ کے افراد ہلاک ہونے والے افراد کے ہتھیار بھی اپنے ساتھ لے گئے۔

ہلاک ہونے والے چاروں افراد کا تعلق ضلع خیبر سے بتایا جاتا ہے اور وہ لشکر اسلام کے شاہین گروپ سے وابستہ تھے۔

یہ واقعہ قبائلی اضلاع میں سرگرم مسلح گروہوں کے درمیان موجود باہمی اختلافات اور رقابت کی ایک اور مثال کے طور پر سامنے آیا ہے، جہاں مختلف گروہوں کے درمیان اثر و رسوخ، وسائل اور دیگر معاملات پر پہلے بھی مسلح تنازعات کی اطلاعات سامنے آتی رہی ہیں۔

تاہم واقعے میں ہلاک ہونے والے افراد کی مکمل شناخت اور تنازع کی دیگر تفصیلات فوری طور پر واضح نہیں ہوسکیں۔