اپر کرم میں ٹریکٹر بارودی سرنگ سے ٹکرا گیا، ڈرائیور محفوظ رہا

کرم(ڈیلی اردو) اپر کرم کے علاقے تائیدہ میں ٹریکٹر بارودی سرنگ سے ٹکرا گیا، جس کے نتیجے میں زور دار دھماکا ہوا اور ٹریکٹر کو نقصان پہنچا، تاہم ڈرائیور محفوظ رہا۔

پولیس ذرائع کے مطابق واقعہ تائیدہ گاؤں میں پیش آیا، جہاں بارودی سرنگ کی زد میں آنے سے ٹریکٹر متاثر ہوا۔ دھماکے کے بعد سکیورٹی اور متعلقہ اداروں کے اہلکار موقع پر پہنچ گئے اور علاقے کا جائزہ لیا۔

اپر کرم میں بارودی سرنگوں کے واقعات میں اضافہ

سیکریٹری انجمن حسینیہ کے مطابق اپر کرم کے مختلف علاقوں میں گزشتہ دو ماہ کے دوران بارودی سرنگوں کے متعدد دھماکے ہو چکے ہیں۔ ان واقعات میں کئی افراد کے زخمی ہونے کے علاوہ بعض متاثرین کے مستقل معذوری کا شکار ہونے کی اطلاعات ہیں، جبکہ بارودی سرنگوں کے دھماکوں میں 2 افراد ہلاک بھی ہو چکے ہیں۔

مختلف علاقوں میں ڈی مائننگ کا عمل جاری

اسسٹنٹ کمشنر اپر کرم خالد عمران کے مطابق علاقے کے مختلف مقامات پر بارودی سرنگوں اور دیگر بارودی مواد کی صفائی کا عمل جاری ہے۔ ان کے مطابق ڈی مائننگ کارروائیوں کے دوران متعدد آئی ای ڈیز اور بارودی سرنگوں کو ناکارہ بنایا جا چکا ہے۔

انتظامیہ کا کہنا ہے کہ بارودی مواد کی صفائی کا مقصد شہریوں کی آمدورفت کو محفوظ بنانا اور مستقبل میں ایسے واقعات کے خطرے کو کم کرنا ہے۔