ایران-امریکہ جنگ کے خاتمے کیلئے ثالثی کی کوششں جاری ہے، پاکستان

اسلام آباد (ڈیلی اردو) پاکستان  نے کہا ہے کہ ایران اور امریکہ کے درمیان جاری جنگ میں حالیہ شدت کے باوجود وہ اس تنازع کے خاتمے کے لیے ثالثی کی کوششیں جاری رکھے ہوئے ہے اور مذاکراتی حل کی حمایت کرتا ہے۔

دفتر خارجہ کے ترجمان طاہر اندرابی نے جمعرات کو صحافیوں سے گفتگو میں کہا کہ حالیہ حملوں اور جوابی کارروائیوں کے بعد حالات امید افزا نظر نہیں آتے، تاہم پاکستان نے امن کوششوں سے دستبردار ہونے کا فیصلہ نہیں کیا۔

انہوں نے کہا، ’’نئی جھڑپوں کے بعد پُرامید رہنا آسان نہیں، لیکن ہم نے امید نہیں چھوڑی اور اپنی سفارتی کوششیں جاری رکھے ہوئے ہیں۔‘‘ ترجمان نے کہا کہ پاکستان کی ثالثی کی کوششوں کو قبل از وقت ناکام قرار نہیں دینا چاہیے اور اس حوالے سے رابطے بدستور جاری ہیں۔

ان کا کہنا تھا کہ پاکستان خطے میں بڑھتی ہوئی کشیدگی پر گہری تشویش رکھتا ہے اور اس کا مؤقف ہے کہ تمام متنازع امور کا حل سفارت کاری اور مذاکرات کے ذریعے تلاش کیا جانا چاہیے۔ 

یہ بیان ایسے وقت میں سامنے آیا ہے جب امریکہ نے جمعرات کو ایران پر نئے حملے کیے، جس کے جواب میں تہران نے بھی جوابی کارروائی کی۔ 

امریکی قیادت ایران پر الزام عائد کر رہی ہے کہ وہ جنگ کے خاتمے کے لیے ہونے والے مذاکرات کو طول دے رہا ہے۔

طاہر اندرابی نے بتایا کہ پاکستان کے وزیر داخلہ حالیہ دنوں میں تہران کے دورے سے واپس آئے ہیں، جہاں انہوں نے ایرانی قیادت کو وزیراعظم پاکستان کا خصوصی پیغام اور خط پہنچایا۔

انہوں نے کہا کہ یہ رابطے پاکستان کی جاری ثالثی کوششوں کا حصہ ہیں، جن کا مقصد خطے میں امن و استحکام کو فروغ دینا ہے۔