ایران جوہری منصوبوں سے پیچھے ہٹ چکا ہے، ٹرمپ کا دعویٰ

واشنگٹن(ڈیلی اردو) امریکی صدر ڈونلڈ ٹرمپ نے دعویٰ کیا ہے کہ ایران اپنے جوہری ہتھیاروں سے متعلق کئی منصوبوں سے دستبردار ہوچکا ہے، جبکہ انہوں نے ایک بار پھر واضح کیا کہ تہران کو جوہری ہتھیار حاصل کرنے کی اجازت نہیں دی جائے گی۔

ٹرمپ نے صحافیوں سے گفتگو کرتے ہوئے کہا کہ وہ ایران کے بارے میں جلد ایک اہم فیصلہ کریں گے، تاہم انہوں نے یہ نہیں بتایا کہ ممکنہ فیصلہ کیا ہوگا یا اس کی نوعیت کیا ہے۔

امریکی صدر نے اپنی انتظامیہ کی معاشی پالیسیوں کا ذکر کرتے ہوئے کہا کہ قیمتوں میں کمی لانے میں پیش رفت ہوئی ہے اور اس وقت عالمی سطح پر تیل کی قیمتیں بھی کم ہورہی ہیں۔

ٹرمپ اس سے قبل بھی کہہ چکے ہیں کہ ایران کے ساتھ جاری جنگ جلد ختم ہوسکتی ہے۔ ان کے مطابق جنگ ممکنہ طور پر نومبر میں ہونے والے امریکی وسط مدتی انتخابات کے بعد یا اس سے پہلے بھی ختم ہوسکتی ہے، جس کے نتیجے میں تیل کی قیمتوں میں مزید کمی متوقع ہے۔

امریکی صدر کا کہنا ہے کہ ایران کو جوہری ہتھیار بنانے سے روکنا ان کی پالیسی کا بنیادی مقصد ہے۔ ان کے بقول امریکی حملوں سے ایران کی جوہری صلاحیتوں کو شدید نقصان پہنچا ہے اور تہران کو تباہ ہونے والے ڈھانچے کی بحالی میں کئی سال لگ سکتے ہیں۔

ٹرمپ نے رواں ہفتے یہ بھی بتایا تھا کہ امریکی حکام نے جنگ کے خاتمے کے لیے ثالثوں کے ذریعے رابطے کیے ہیں۔ ان کا کہنا تھا کہ انہیں توقع ہے کہ امریکا جلد اپنی جنگی مہم میں کامیابی حاصل کرلے گا۔