ایران مذاکرات: نور خان ایئربیس پر 6 امریکی طیاروں کی لینڈنگ

اسلام آباد (ڈیلی اردو) امریکا کے کم از کم 6 فوجی طیاروں نے پاکستان کے نور خان ایئر بیس راولپنڈی میں لینڈنگ کی، جس کے بعد وہ واپس روانہ ہو گئے۔ دوسری جانب امریکی نائب صدر جے ڈی وینس وفد کے ہمراہ چند گھنٹوں میں اسلام آباد پہنچنے والے ہیں۔

ڈیلی اردو کے مطابق صدر ڈونلڈ ٹرمپ نے فوکس نیوز کو بتایا کہ امریکی وفد، جس میں جے ڈی وینس سمیت دیگر اراکین شامل ہیں، آج رات اسلام آباد پہنچے گا۔ انہوں نے کہا کہ مذاکرات سنجیدہ نوعیت کے ہیں اور کوئی فریق انہیں کھیل تماشا نہیں بنا رہا۔

ٹرمپ نے مزید کہا کہ اگر مذاکرات میں پیش رفت ہوئی تو وہ ایرانی قیادت سے ملاقات پر غور کریں گے۔ ان کے مطابق امریکا کا بنیادی مطالبہ ہے کہ ایران ایٹمی ہتھیار حاصل نہ کرے۔

امریکی صدر کے مطابق ایران کو اگر معاہدہ قبول ہوتا ہے تو اسے ترقی کے مواقع میسر آ سکتے ہیں۔ تاہم برطانوی جریدے کے مطابق ٹرمپ انتظامیہ ایران کو محدود مدت کے لیے یورینیم افزودگی کی مشروط اجازت دینے پر غور کر رہی ہے۔

دوسری جانب فلائٹ ٹریکنگ ڈیٹا کے مطابق نور خان ایئر بیس پر گزشتہ 48 گھنٹوں کے دوران امریکی فوج کے کم از کم 6 طیارے لینڈ کر کے واپس روانہ ہوئے، جن میں لاجسٹک اور مواصلاتی آلات منتقل کرنے والے طیارے بھی شامل تھے۔

اسلام آباد میں امریکا اور ایران کے درمیان مذاکرات کے دوسرے دور کے لیے سکیورٹی سخت کر دی گئی ہے۔ 

شہر کے کئی علاقے سیل کر دیے گئے ہیں جبکہ 20 ہزار سکیورٹی اہلکار تعینات ہیں۔ دو بڑے ہوٹلوں کو بھی غیر ملکی وفود کی آمد کے پیش نظر خالی کرا لیا گیا ہے۔

ادھر خلیج عمان میں امریکی کارروائی کے بعد ایران اور امریکا کے درمیان کشیدگی میں اضافہ ہو گیا ہے۔ ایران نے حالیہ صورتحال کے باعث مذاکراتی عمل سے انکار کر دیا ہے۔ تہران کا کہنا ہے کہ موجودہ حالات میں امریکا پر اعتماد نہیں کیا جا سکتا۔